مدونة راقية في مٌحادثة عميقة مع " الفوضى _ (4 زائر)

[Second Heartbeat]

ايمت بعرف اني عنجد صرت فارة جم؟
مو بعدد السنين الي انتبهت انو اخر هالسنة رح كمل ١٥ سنة. بل بسلوكي الي تغير تغير جذري خلال هالسنين.

صرت البس تياب فضفاضة اخر همي الناس كيف شايفة شكلي في تطور او لا او اعمل show off . صرت lowkey af

ماعدت اهتم اعمل رفقات للجم. وجه ستريت. جدية. تركيزي بالتمرين وبس ويالله يكون عندي تركيز سلم ع حدا

صرت من الناس الي حتى وهي ملتعنة حالها لازم تروح للجم. مرضانة. تعبانة. مو نايمة منيح مو اكلة. عندا اصابة بمكان معين. بعد دوام متعب وطويل.

وبالنسبة للطقس، في عواصف تلوج مطر هوا. جو بارد مالي خلق ماعندي طاقة شوب ماعندي شي البسو بدي اغسل تيابي ماعندي شي البسو البري وورك اوت خلص يالله الباص راح لازم روح بالبسكليتة البسكليتة بدا تنشف من المطر فيا رطوبة. وصلت للجم اكتشفت اني نسيانة الايربودز. رجعت ع البيت وردت رجعت ع الجم. الخ الخ الخ

اهم شي. اني كنسل طلعة حلوة مشان اتمرن

لازم اتمرن لازم اتمرن. كتير او شوي. طاقة عالية او منخفضة. تمرين واحد اترك وامشي او كمل. لازم اتمرن

هي عقلية مو صعبة لا مستحيل شخص صرلو مبلش شهر او حتى سنة تكون عندو. ممكن ربعها بس مو كل الي انكتب

حياتنا نادر ما يكون عندا دائرة معارف كبيرة. يالله حياتنا شغل وجيم. لما نمرض ونضطر نضل بالبيت بيجينا كآبة. منحاول نروح ع الجم نعمل اي شي حتى لو رح نقعد باللوبي المهم انو نسجل حضور يعني

طلعت من زمان من موضوع الشكل. حتى لو تلاقي بنت او شب جسمن فيه دهون. وزن زايد. و زوايد ع الايد او الرجل بتعرف انو هالبنت او الشب بيتمرن من زماااان لان علامات التمرين الطويلة مبينة حتى لو هدول قطعوا فترة. حتى لو ما مبينة ع جسمن طريقة تمرينن بتقفرهم من مسافة الاف الاميال انن بيتمرنوا من زمان. زاوية حركية صحيحة وزن معقول. سرعة معتدلة. تنفس صح. تركيز مليون. عقلك مندمج مع جسمك. هدول الشغلات مستحيل تلاقوهم بحدا صرلو بالجم شهر. كالعادة وحتى سنة. يمكن بتفكروها سهلة وسخيفة وانا معكن لحتى ما جربت. لما يكون عندي مشكلة كتيييير صعب التركيز ياما كنت اتمرن وعقلي بمكان تاني وحرفياً بطلع مو مستفيدة من التمرين وماحاسة بأي شي. بس مع التدريب الواحد بيقدر يفصل مشاكلو بالجم. بس خلص لما تعلمت كيف هذب نفسي وعقلي وانو وقت الجم هو وقت لراحة العقل واعملو اوف هالموضوع كتير صعب وتطلب من كتير طاقة.

ف هدول ببينوا سفر سنة انن من زماان بيتمرنوا. اغلبن ٩٩٪؜ lowkey . جسمن مو مبين كيف شكلو. تعابير وجههم محايدة. تحسوهن روبوتات وقت التمرين لانن تعلموا كيف يكونوا نفس الالة وقت العدات. يخدروا احساسن حتى لو وصلوا لقبل اخر عدة وخلص رح يموتوا. مدربين عقلن انو خلص الست بدا تكمل بدا تكمل حتى لو وصل الجسم للرجفة ( وهون يكمن الهابي ايندينق happy ending )

كيف بتعرف انو هالشخص قديم؟ لما بعد ست دماااار حرفياً. صععععب ومتعب. خلصها و بدل لا يبكي او يبين عليه علامات انو متضايق وتعبان بتشوفو بيضحك بشكل هستيري وهو عم يلهث بتعرفوا انو وصل هرمون السعادة لاقصى درجاتو.

بتحس في شي جوا عم يدغدغو لك و بيضحكككك حتى هو بيستغرب ليه عم يضحك بس مو بتصنع هو عم يضحك من قلبو. احساس غريب ومريح بنفس الوقت مابعرف كيف اشرحو

فكرة لما كون بعطلة و مسافرة بشتاق كتير للجم بالرغم من اني مداومة فيه يومياً. الغريب اني بمل اي مكان بروح عليه كل يوم عدا الجم. مع انو نفس الروتين. نفس الاغاني تقريباً. نفس العادات. نفس التعب. ليه ماعم مل؟!!

 

[Second Heartbeat]

-




هالسنة رح تكون تحت هاشتاق
RESISTANCE#
مقاومة الاكتآب
مقاومة فيقة الصبح
مقاومة الجوع
مقاومة الدوخة و رجفة الايدين
مقاومة ضربات القلب القوية و السريعة
مقاومة وجع الجسم
مقاومة الحزن
مقاومة الضعف
مقاومة الأفكار
مقاومة التحليل السلبي
مقاومة كل حدا قلل من امكانياتي
مقاومة كل حدا تمسخر عني ان كان مباشر او من تحت لتحت
مقاومة الإنكسار
مقاومة الأصوات الداخلية السلبية
مقاومة شخصياتي الخمسة
مقاومة نظرات الناس الغريبة
مقاومة كل يوم تقيل على القلب
مقاومة الوحدة
مقاومة جلد الذات
مقاومة التنمر
مقاومة سماع النم و الذم و اكل الخرا و اعمل حالي مو سامعة
مقاومة ككككل يوم خرا بإبتسامة

هالسنة سنتي سميتها سنة المقاومة
لأن من الاخر يا أنا يا أنا و مو شايفة حدا غيري , ممكن اذا جارى سرعتي

سنة المشي عكس التيار , ما عدت امشي معو

هالمرة ما رح اطلع برا اي حدود او صندوق لأني ما عدت شوف لا حدود ولا صندوق

#RESISTENCE

But I'm scarred, by barriers placed in my path
I'm scathed

This ride that takes me through life
Leads me into darkness but emerges into light
No one can ever slow me down
I'll stay unbound​

 

[Second Heartbeat]

-




انا مو مصدقة اني بلشت حب الركض, ما تخيلت بيوم من الايام اركض ساعة متواصلة حسيت هالشي اقرب للحلم بالنسبة الي
و مو بس ساعة لا ووصلت 8 كيلو , و 5 كيلو ب 33 دقيقة و متوسط قطع مسافة 5 كيلو للبنات 35 دقيقة

اكيد بقدر شد عحالي و اركض 5 كيلو بأقل من 33 , بس التدرج حلو

انا مبسوطة من حالي لأن الشي الي بعملو ناس نحااااف ما بيقدروا يعملوها
ناس بكامل صحتن و ماعندن اصابات
ناس ما بتدخن ومابتفكر ولو مجرد تفكير جسما شو قادر يعمل
ناس بكتلة عضلية قليلة و جسم اخف ما بيعملوها

الحلو اني وصلت 8 كيلو و ما كنت مطلعة كل طاقتي , مع الايام رح اركض اكتر من ساعة لأن ناوية شارك بنص ماراثون

ان شاء الله اقدر , لأن في ماراثون ببرلين كبييير بصير كل سنة , حابة شارك فيه مو كسباق بس كإنجاز للذات

-

حتى ما خطر ببالي قبل دور ع اساسيات الركض , بس من لما صرت مهتمة ف صار الانستا يطلعلي كتير فديوات عنو
طلع حلو مو سيء متل ما كنت متخيلتو , و الاحلى انو نسبة ضئييييلة من الناس الي بتركض اساساَ, مع اني والله مستغربة
من هالنسبة القليلة يعني انا ولاشي مقارنة بباقي الناس بس شكلو محدا الو خلق و حيل يطلع و يمارس اي نوع رياضة

تعلمت اساسيات التنفس , وكيف نظم تنفسي , هالشي كتيير فادني , فادني مو بس بالركض حتى بالايام العادية لما يتعب نفسي
اعرف كيف نظمو مو اتنفس بعشوائية , طريقة التنفس الصح بتفيد الجسم مو بس ما بتخليني اهلك و اتعب

طريقة الركض الصح , و انا كل عمري كنت اركض برجلي و هو المفروض اركض بفخادي او اردافي متل ما بيحكوا
و الضهر يكون مايل لقدام شوي و عنجد فرق الركض عندي بس عملت هالكم تعديل البسيط , لان عندي فخاد قوايا ماعم بستخدمن و انا عم اركض برجلي ف اختلف الحكي هون صار في توفير للطاقة

و عرفت كمان جداول الركض خلال الاسبوع و انواعها منها السبرنت و منها الركض السهل ( الوقت ) و منها ركض الكيلوات

انا اول نص ساعة ركض كيلوات و تاني نص ساعة ركض سهل لكمل النص ساعة الباقية

حكوا بس طورت من مستواي بأول نص ساعة اركض كيلوات اكتر بتطور تاني نص ساعة

هاد غير صار عندي ركض العالي سهل بشكل ما تخيلتو , حكيت ببالي معقول هو سهل ؟ و لا انا ضليت اتدرب لحتى صرت شوفو سهل ؟

صرت اركض نص ساعة كاملة ان كان بوزن برجلي او بدون وزن على اعلى مستوى بعدين كمل ركض ع مستوى مستوي

صح بتطلع روحي بس جد هاد من افضل تمارين المقاومة عندي

هاد انجازي الحالي بالركض ما دخلت بالحديد و التكنيكات الجديدة الي تعلمتا

الله يستر من الي جاية , فيني طاقة 32 سنة كاملة


Don't fall off the track yet with so many races to go
HOLD ON

























​

 

[Second Heartbeat]

-



​

مشكلة المجتمعات أنها ترفض تتقبل الشخص اللي يمشي في مساره الخاص واللي يعتبروه منافي لفطرتهم رغم أنها مش فطرة أصلاً إصرارك ومحاولاتك وانجازاتك وعمقك وافكارك كله بالنسبة لي أمر يستحق الاحترام ​

ما تتخيلي اديه بحبك و بحب كلماتك
منبع الطاقة الايجابية

​

 

[Second Heartbeat]

في مشروع براسي
بما اني ما برسم الا لما كون كتير مكتئبة او كتير حابة
بدي ارسم ع كانفاس وهي اول مرة برسم ع هيك حجم 170 عرض ب 50 طول

و بدي علقا بالبيت. عنجد حابة جن شوي بالالوان. و اخترت الفن التجريدي. بعشق ستايل بيكاسو معوق بيشبهني

لشوف شو بيطلع معي. بس متأكدة رح يطلع شي مو بس حلو لا وار.

الفن الي بيطلع معي بحالة الكآبة او الحب ببدع بشكل
الله يستر ما وسخ البيت بالالوان

 

[Second Heartbeat]

من الشغلات الي عم ركز عليها هلأ ال inline skating رح اخدو بجدية اكتر متل ماكنت صغيرة.

صح فيني اصابة بضهري بس طز هههههه طلبت سيفتي لان في كم حركة ببالي بدي اتعلمن

بيحكوا دامني بقدر اتخيل الحركة بقدر اعملا

هي حركة مركبة من حركة بعملا اساساً بس لانها جديدة علي جبت سيفتي للاحتياط

و جبت هاد السكيت





حرفيا هاد عملي upgrade

مو طبيعي لمستواي
توزان اكبر ووقت النط خاصةً مابخلي الرجل تروح يمين ويسار ثابت بشكل واهم اهم اهم شي صوتو ع الارض كتير منخفض

و قالبو فيه متل شوز داخلي بيطلع ف بصير متل بوط بلبسو عادي والبوط بيدخل بالسكيت هالتصميم بخلي الرجل اثبت جوا السكيت كأنها رجلي مو كأني لابسة سكيت لا كأن رجلي هي السكيت مابعرف لو فهمتوا علي

و قبل مبارح كان في تجمع سكيت بمديتني يالله شو انبسطت. كوووووومةةةةة. هي اول مرة بعد ١٣ سنة بجتمع مع لعيبة سكيت بقروب. حسيت رجعت ذكريات زمان هههههه

الاحلى كان في كذا مجموعة ٤ وبكل مجموعة كان في سيارة فيها ديجي بتمشي معنا. يالله شو كان حلووو

و مطرت و تحقق حلم من احلامي اني العب سكيت تحت المطر حسيت اني طاااايرةةة

ف اي بدي انتقل للمستوى التاني لان في كتير حركات انا بعرف اني بقدر اعملن بس بدا رك شوي عاد نشالله هالرك مايجي ع ضهري

كل وقعة بوقعا بتشقلب ياريت لو وقعة عادية

اي حتى السيفتي الي طلبتا شكلا مميز. ماعاد جيب شي ممل بس لانو ارخص. لان كل حيلتي وفتيلتي هالهوايتين الجم و السكيت ف عم استثمر فيهن وخلي شخصيتي تبين من خلالن






شوفوا الجمال متخيلين اديه رح يطلعوا حلوين مع لون سكيتي ؟

ضليت دور كتير ع شي بكون مميز و مو ابيض سادة.

بس الهلمت مابدي ياها. مابوقع ابداً ع راسي. هي اكتر شي بيستخدموها ع رانك السكيت. هنيك اي في احتمال الواحد يوقع ع راسو

يالله شو متحمسة. صرت العب مينيموم مرة بالاسبوع لان عم انضغط بين جدول الجم والسكيت والراحة وكمان الطقس عنا كل يوم شكل. ومرات عم العب مرتين بالاسبوع يعني كلما سمحتلي الفرصة شايلة السكيت ورايحة

لان شفت فديو لواحد بيحكي كيف عم يتطور مستواي بالسكيت او كيف عم العب منيح؟

حكا ببساطة اطلع كل يوم العب سكيت. كلما لعبت اكتر كلما فهمت ع جسمك اكتر و صار توازنك اقوى

ف اي حمسني ههههه

وكمان تعلمت ع تطبيق اسمو strava هاد خاص للي بيكضوا اكتر شي. بس عم استخدمو وقت السكيت احلا شي فيه لما شغلو بيشتغل ع ال GPS و بيرسم خريطة كاملة للطريق الي اخدتو لما اخلص. و الخريطة فيني حملا ع شكل png و اعمل عليا فديوات وانشرن ع السوشل ميديا انو ورجي الناس المسافة و الطريق الي مشيتو بشكل كول

طبعاً بيعطي الوقت والمسافة و الخريطة

تطبيق حلو فينا نتابع بعض لو حدا عندو ياه و شوف انجازاتكن و فعالياتكن بالتطبيق في سكيت ركض بسكليت وحتى مشي. اي رياضة بتتحرك من مكانك فيك تستخدمو مشان يشتغل ال gps

المهم نراكم بتدوينة تانية مليانة طاقة ايجابية
لان بكفي الايام المرة الي عم نمر فيها

باااااي

 

[Second Heartbeat]

بتعرفوا شو فكرت؟
قلت ما اغباني
ما اغباني
اديه بعرف صمم وكنت اعمل شغلات عنجد شوفا piece of art

انو ليه ما اعمل تصميم و اطبعو ع شكل فريم صورة وعلقا بالبيت؟

ما في كتااار مصممين بيعملوا هيك

انو من ايمت عم صمم ما خطرلي اعمل هيك؟

في اعمال ديجيتال مطبوعة و في منن حتى بيفتحوا معارض الن

الغباء لما يتجسد تفضلوا

 

[Second Heartbeat]

المفروض نزل هالتدوينة مبارح بمناسبة عيد ميلادي :

.

كل سنة عم تمر عم اكتشف حالي اكتر ، قبل ٥ سنين كنت ماحب حالي نفس هلأ، كنت اجلد حالي ع ابسط واتفه الاشياء. كنت اكره عيوني، شعري، وشي وجسمي. كنت حط عدسات ملونة ماحب لونن و لعنت سلسفيل شعري من حلق و حرق بالالوان و جسمي كلما كنت قرب من الشكل المثالي ماحس اني اقتنعت و دايماً يكون عندي شعور انو بدي خبي شي منو لاني شايفتو مو حلو ومو متقبلتو. " مع اني حالياً لما شوف صوري قبل احكي كان كامل بس النقص الداخلي شو بيعمل ؟ " ووشي ماكنت فكر اطلع من البيت او صور فديو بدون مكياج او فلتر، ما كنت اتقبل المجاملات من اي حدا وحس انها كذب وماحس بالإطراء. لاكتشفت واخيراً المشكلة كانت داخلية ولو شو ما عملت مارح حب حالي متل ماهي لو ما شفيت جزء كنت شوفو مستحيل انو ينشفى. بس صدق من قال ان التجارب اعظم معلم وهي الي بتصقل البني ادم و بتمعكو معكة محترمة وان الوقت اد ما طال رح يشفي جروح قديمة. سنة عن سنة عم اتقرب من حالي اكتر، عم افهم حالي اكتر وعم حب حالي اكتر، مو نرجسية بل صار عندي تقدير عال للذات.

.

صرت بعشق لون عيوني و اكتشفت انن كتير حلوين بس ماكنت اعطيهن فرصة بالاساس ولون شعري الكستنائي اكتشفت انو احلى من كل الالوان الي عملتن خاصةً لما تجي عليه اشعة الشمس بصير بيلمع. وشي بكل عيوبو بجنن خاصةً لما يحمروا خدودي من كتر الشوب. جسمي شو احكي لجسمي بعشق سلبياتو قبل ايجابياتو و صح قعدت مع حالي وحكيت كيف اكره جسمي وهو عم يعمل اشياء كتير ناس مابيقدروا يعملوا ربعها ؟ المجاملات صرت وبشكل غريب اتقبلها لا وصدقها و حس بأنوثتي و بحكي شكراً بدل ما اتعوق و احكي لا انا مو هيك لا انا مو شايفة حالي هيك الخ الخ متل قبل !

.

ما عدت امشي عكس التيار، مرات الشفاء بكون ان نترك العناء ونمشي معو ولو لمرة و احكي لطيزي شو يعني لو فلان ماحبني متل ما انا. ليه لحتى فلان مايحب طبيعتي وليه لاضطر اني اتصنع شخصية مو انا لارضي اي حدا. وليه لغير من شكل جسمي لاتماشى مع معايير مجتمع معوق لا يمثلني بالاساس. او لاعجب فلان او كون محط الانظار بحفلة فلانة، كنت دايماً بتمنى كون البنت الكيوت مشان اتماشى مع مجتمع معاق، انو شوفوا الانثى " ع الاساس " و خدلك ع تصنع مياعة الي كنت فاهمة مصطلح الانوثة خطأ! بس واخيراً حبيت فكرة ال " لطيزي " شو ما فكروا! " اسفة ع الكلمة بس هي اكتر كلمة بتوصف المرحلة الي انا فيها !

انا مو كيوت، خلقت طريق تاني بمثل شخصيتي وهي اني متمردة ع كل شي بما فيهن المجتمع، الافكار، الاشخاص، الافعال وحتى المنطق! و كل ٩ بنات كيوت حبيت كون رقم ١٠ المتمردة.

.

في مقولة مشهورة بتحكي :​

الرغبة بأن تكون محبوباً هي الوهم الأخير، تَخلّ عنها وستكون حراً.​

بالأول حاولت صدقها وامشي عليها كنت اتضايق، بس يوم عم يوم كنت اكتشف واسأل حالي؛ ليه حاملة السلم بالعرض ؟ ليه لحتى اتنازل عن كتير شغلات حقيقية فيني لكون محبوبة؟ والسؤال الأهم؛ من مين ؟ سألت حالي: هل هدول الاشخاص بيستاهلوا بالأساس هاد التنازل مشان يشوفوني محبوبة؟ جوابي كان؛ اكيد لا.
وهون وصلت لهل المرحلة واخيراً انا حُرة بالمعنى الحرفي. من جوات قلبي ماعدت اهتم ان دخلت مكان حدا حبني او لا مدام اقرب ناسي وهن اهلي بحبوني. عدا عن هيك حب حدا من عدمه مارح يأثر علي بأي شي. وانا هي انا.
.

مريت بحروب نفسية ما بيعلم فيا غير الله و مريت منها متل الشعرة من العجين. مريت بأفكار انتحارية، مشاكل صحية، خسرت ناس غالين علي، تركت اماكن كانت جزء من روحي، دقت معنى الوحدة بأبشع صورها. خسرت احلامي وطموحاتي الي تأملت لما كنت بالعشرين اني كون محققتا بهل العمر. بس اكتشفت بعد كل هالحروب الي مريت فيها ان اعظم انتصار الي هي صحتي النفسية، العقلية، الجسدية و اهلي الي بحبن جمبي و سالمين.

.

و بإذن الله السنة الجاية رح كون بمكان اعلى من اليوم ومحققة الي ببالي مع الناس الي بحبن و بحبوني.
كل عام وانا جبارة قدام الصعوبات الي عم مر فيها، كل عام وانا لساتني مُقاومة هالحياة البائسة و كل عام وانا عم اتقرب من ذاتي اكتر
هالتدوينة لالي اكتر ما تكون لالكن فلا تدققوا كتير بمحتواها ​