Pleiades - عُنقُود الثّريَا (3 زائر)

[Pleiades]

رح اتكلم عن شيء يمكن الكثير ما يتفقون معاي فيه وهو الذكاء الاصطناعي وتطوره
(قبل كل شيء هذا فقط رأي شخصي ومو جالسة اهاجم احد ولا عمل معين هذا فقط نتيجة وصلت اليها من السنين الفائتة من سيطرة الذكاء الاصطناعي)
بأوائل ظهور تطبيقات الذكاء الاصطناعي و صناعة الصور و الفيديوهات كنت احس انه شي حلو و خارق للعادة لأنه حرفيا كومبيوتر من صنع الانسان يسوي اشياء كذا
بس تقريبا صار الحين من اكثر الاشياء يلي اكرهها و صارت تنرفزني و كل ما شفت صورة مصممة بيه او فيديو انزعج
الذكاء الاصطناعي قتل الابداع و الفن وجرد الانسان من شخصيته و تميزه عن غيره وجعلنا كلنا في نفس المرتبة
الرسم و التصميم و التصوير و الكتابة و غيرها من الأشياء الي يولدها الانسان بابداعه و فكره الخاص و الي يعكس شخصيته، هي اشياء و فنون خارقة مو اي احد يقدر يسويها بس الحين الكل تخلى عن هذي الميزات لأن لقى لها بديل
الاعلانات يلي تظهر في مواقع التواصل الاجتماعي للترويج للشركات او منتوج معين صارت سهلة التمييز على انها تصميم رخيص مافيه ذرة ابداع تم توليده بالذكاء الاصطناعي، لا يحترم الوان ولا يحترم قواعد التصميم
بدل ما تتعب الشركات و تستغل امكانية اشخاص مصممين ذي كفاءة و ذو خبرة في المجال و تعطيهم حقهم وتخلي لهم الحرية في الابداع، لقو البديل الأرخص وخليني اقول البشع الي تحصل عليه بضغطة زر، صرت اعرف الشركات الموثوقة و المثابرة ويلي تعرف اساسيات التسويق من الشركات الي تبحث عن الجاهز و السهل بس من هذا الشيء
ولا ننسى بالطبع اننا ما صرنا نفرق بين فيديو واقعي وفيديو تم صنعه، لأنه في تطور شديد، صار ينتهك خصوصية الغير و يتقمص شخصيات، يشوه سمعة ناس و يستعمل ضدهم ويزيف الأخبار و الناس ما تستوعب خطورة هذا الشيء
الجانب الوحيد الي شفته للحين من الذكاء الاصطناعي، هو فيديو لفتاة عمياء تستعمل نظارات Ray ban meta Ai وكانت تبغى تشتري حذاء من المحل، وعلى هالأساس النظارة المزودة بكاميرا توصف لها شكل الحذاء يلي بيدها وتقرر لو تشتريه او لا
مثل المجال الصحي هناك من يقول ان الذكاء الاصطناعي بعد فترة من الزمان رح يستبدل اخصائي الاشعة
لكن من وجهة نظري الذكاء الاصطناعي مو لازم يستبدل انسان، سواء كان طبيب او شيء ثاني، بل لازم يساعده، ويصير الطبيب الي يستعمل الذكاء الاصطناعي في عمله احسن من الذي لا يستعمله و بالذكاء الاصطناعي لا اقصد انه يبعثله ملف المريض ويخليه يشخصه لحاله، مجال الذكاء الاصطناعي واسع ويمكن استعماله بطرق عقلانية
انا عن نفسي حدي في استعمال التطبيقات هاذي اني ابعثلهم فقرة معينة من محاضرة حتى يشرحوها لي لو مافهمت او يلخصوها لي، بس مستحيل ابعث لبرنامج لا يملك عقل ولا روح اسم الدرس لوحده واعتمد عليه واوثق فيه ثقة عمياء في الدراسة!
مثال اكبر هو اني ابعثله الامتحانات السابقة ويعطيني كل المعلومات يلي اجت عن الدرس الفلاتي و على ايش ركزو، بدال ما اني اقرأ الامتحان كله و اجوبته و اعيد اكتب الاجوبة الصحيحة فقط، هنا اختصر علي لا اكثر
بس من جهة الصورة و الصوت و الفيديوهات اشوف ان الذكاء الاصطناعي اكبر قتل لموهبة الانسان، واتمنى بشدة انهم يضعو حد له مثل غلق موقع sora AI مدري لو كانت اشاعة او لا بس قرار الغلق هو احسن شي، قبل خبر الغلق ذاك كان في فيديوهات اصدقها الى نهايتها، و الكل مصدقها الى أن يظهرلك العلامة المائية ل sora AI وهو الدليل الوحيد على انه ذكاء اصطناعي
تراه شيء مخيف، و الأشخاص الخالين من الابداع و يلي ما يقدرون تعب الاشخاص الي تم استبدالهم بالذكاء الاصطناعي هم السبب في استمرار هالشيء، مجتمع المصممين تكلمو عن هالشيء في المواقع ولكن تقبلو نقد من اشخاص خارج المجال لأنهم ببساطة لا يعرفون اساسيات التصميم واعينهم ما تضرهم لما يشوفو اساسيات لا تحترم، فوق ما انها نسخ لصق، نفس الاسلوب نفس الالوان حتى الخط ما يتغييررر يالله
لو استمر هذا الشيء في التطور رح تصير في مخاطر اكبر، بس الناس الحين ما رح تدركها الا مستقبلا لما يصيرون ضحايا لمولدات الذكاء الاصطناعي
وفوق كل هذا، عادي ما نفكر لا في الانسان ولا في ابداعه ولا في جهده، نفكر في الطبيعة و المياه الي تستعمل في تبريد قواعد الذكاء الاصطناعي، لكل 20 سؤال يستعملون 500مل من الماء وهذي مجرد اسئلة فقطـ تخيلو لو صورة او فيديو؟ وتخيلو عدد الاسئلة الي تطرح في اليوم الواحد؟ ومصير هذي المياه اما ان تتبخر وهالشيء مسبب من مسببات التغيرات المناخية المفاجئة واما ان تروح للصرف الصحي اكرمكم الله ، بدال ما يستهلكها الانسان في الشرب او في احتياجاته اليومية
اتمنى لو كل واحد يحاول يقلل منه، انا من الناس احيانا احتاجه في الدراسة لأن الدكاترة ماشاء الله عليهم محاضراتهم مفهومة جدا لكن بنفس الوقت ما اروح الجأ له و اوقف تشغيل مخي في اسئلة تافهة او محادثات فارغة بل استعمله للضرورة القصوى فقط
صراحة كنت رح احط هذا الموضوع في القسم العام على شكل نقاش اشوف اراء الغير منها بس احس اني رح اتكنسل

​

 

[Pleiades]

صار عندي عجز كبير هالأيام مدري ليش لي ايام كثيرة اخطط فيها اكتب تدوينة بس العجز يقتلني
المهم تدوينة اليوم رح اتكلم فيها عن تجربتي مع الحياكة وهي هواية تعلمتها قبل 4 سنين
للأسف انا احيك بس في الصيف ومرات في الويكند او عطل نصف السنة لأني ما احب اخلي شي في النص لهذا اخذ راحتي في مشروع معين طيلة الصيف
كنت ابغى اعرض كل الأشياء الي سويتها هنا في المدونة بس عجزت (انا يا دوبي قضيت على العجز حتى كتبت مدونة ) ومنهم ملابس وما ابغى احط صوري هنا فـيمكن احط بس التوتوريال او شكل تقريبي
بس بما ان عندي صور جاهزة لـ 3 أشياء رح احطهم

اولا السبب الي خلاني ابدا الحياكة هي اني استلهمتها من امي لما كنت صغيرة سوتلي شال و قبعة للشتاء (للحين البسهم) وحسيت ان صنع شيء خاص فيك بيديك هو شيء خارق ورائع (هذي نظرتي لأي شيء مصنوع يدويا)
السبب الثاني وهو انو مرة طلعلي حساب في الانستغرام يبيع اشياء محاكة و استلهمت منها فـقررت اني في الصيف ابدا اتعلم
بديت بالأساسيات اشتريت كبة صوف عشوائية و سنارة الحياكة و شفت شلون اسوي مربع بس ابشركم طلع شكل هندسي غريب
و حسيت ان الغرزة كانت مرة ضيقة فـحركة يدي و السنارة كانت محدودة جدا
لكن اتذكر للحين شلون كنت فخورة بيه واني قدرت اسوي شيء كذا بس بعد محاولات تداركت اخطائي و ليش طلع معي كذا
بعدها صرت احاول اسوي اشياء اكثر من مجرد مربع، سويت حقيبة صغيرة (ماكانت حلوة الصراحة وولا مرة لبستها )
لكن ما استعملت فيها ولا توتوريال ، يعني العمل كان بخطواتي الخاصة وخيالي الخاص كنت بس لما يصير معي مشكل اسأل امي وهي تساعدني
كنت ابغى افتح الحقيبة هذي حتى استفاد من الصوف المستعمل فيها بمشاريع ثانية لأني ما البسها بس بعد تفكير قلت عادي بشتري صوف ثاني وخلاص
لأنها اول شيء سويته

ثاني شي سويته كانت هذي الحقيبة

محتوى مخفي

المشكل اني ما فكرت مرتين قبل ما اسويها سويتها في 3 أيام قبل سفرة الصيف سويتها بس ما لبستها بعد فـيمكن هذي رح افكر اني استعمل صوفها منجد، لأني ما لقيت شلون استعملها، مشكلة الصوف انه يتجعد فـكل ما كان شي ثقيل كل ما صارت الحقيبة اكبر ، ولو غلفتها من الداخل بقماش احس المنظر رح يصير بشع لهذا ماكان منها فايدة

ثالث شي كان هذا الكارديغان

محتوى مخفي

يمكن اكثر شيء اتبعني وانا اسويه في الاشياء يلي سويتهم كلها مو لأنه صعب، هو سهل جدا على فكرة لكن مدري شلون فكرت ان هذا اقدر اسويه بسهولة وانا كنت متعلمة الكروشي لشهرين فقط و ما فكرت اغير الوانه فـسويت نفس الألوان يلي في الفيديو
قعدت اسويه لحوالي 3 اشهر وهذا هو يمكن المشروع الوحيد يلي مع اني بديته في الصيف حاولت اكمل اشتغل عليه في وسط السنة الدراسية وحمد لله قدرت انهيه، بس انهيته لما الحرارة بدت ترتفع و اجلت لبسه حتى السنة يلي وراها
كنت مرتبكة و قلقة جدا من فكرة اني البس شيء من صنعي الخاص او يمكن اتعرض لانتقادات لأنه ما كان مرة مثالي، لكني تشجعت ولبسته
في هذاك الوقت كنت بالثانوي وحرفيا هذاك هو اكثر يوم تلقيت فيه مدح بحياتي حتى من بنات ما يعرفوني يمكن على الأقل 15 شخص مدحني
ما اقدر اوصف فرحتي في أن ردة فعل الناس كانت عكس ما توقعت وفي بنات قالولي سويلنا و ندفعك لك ولا بيعيه لنا للأسف رفضت لأن مستحيل اعيد الحوسة مالت 3 اشهر ثاني حتى لو بفلوس

رابع شي اخذ مني سنتين لأني فقدت الشغف في نصفه وسحبت عليه لشهور عديدة وفوق كذا بدون توتوريال قعدت اسوي بس حسابات ومخططات فراسي وطلع معاي زي ما تخيلت
بس عموما لقيت فيديو يشبه للشي يلي سويته

محتوى مخفي

الفرق ان كان حقي مرة اوفرسايز اكثر من هذا والوانه مختلفة، سويته بالاسود و الوردي
معندي تعليق عليه لأني انهيته فقط لأني استحيت اوقفه في النص بس طلع حلو عموما

اول تجربة لي في الـplushies و الميداليات هو هذا (مفروض اخطبوط)

محتوى مخفي

حبيته مرة المشكل في بنت بصفي (كانت صديقتي) طلبت مني اعطيها ياه وقبلت مدري شلون و الصورة من تصويرها (الحين قاطعة علاقاتي معاها و ندمت اني اعطيته لها من الأساس ) شكله وهو واقف احسن اما كذا وهو جالس طلع عشوائي التوتوريال


هذا بعد مع انه بسيط بس من القطع المفضلة عندي:

محتوى مخفي

قصته انه كان باقي يومين على العودة للدوام وانا مو لاقية شي على ذوقي بالمحلات بعدها جتني لحظة ادراك
GIRL YOU CAN LITTERALY MAKE THINGS BY YOURSELF!!!
رحت بحثت عن التتوريال و قعدت يومين ما اسوي شي غير حياكته لين انهيته


وهذي التحفة الي ما تتكرر و اكثر شي فخورة بيه من بين كلشي سويته (تصويري)

محتوى مخفي

ما شفت له توتوريال بشكل عام لكن شفت تصميمه في التيكتوك بعدها دققت فيه ولقيت انه عبارة عن مربعات تلصق مع بعض بطريقة معينة حتى يصير شكلها كذا، فـشفت الباترن حق المربعات شلون تتسوى و سويت العدد المعين
تقدرو تلاحظون ان الاخطبوط تطور معاي هذا احسن من يلي قبله و الاشكال الاخرى زي النجمة و الصدفة شفت لها توتوريال و لصقتها على الحقيبة بعد ما انهيتها

سويت بعد هذا الكارديغان :

محتوى مخفي

لكن طلع معاي قصير شوي في اليدين و الحين متعاجزة اكمل الباقي لبسته مرة بس استوعبت ان يده قصيرة وحاولت اسوي له طرق توسيع وتمديد شفتها في اليوتيوب لكن مدري لو ضبطت صراحة
احسن شي اني استعملت صوف مميز وهذا هو :

محتوى مخفي

فيه تدرجات الوان حسيتها متناسقة مع بعضها و الفايب فيها لايق على ستايل الكارديغان


وهذا اخر شي سويته قبل يومين

محتوى مخفي

سويته كهدية لنجاح بنت خالتي الصغيرة و انتقالها للاعدادي It's my love language
هو حوت لكن بنفس الوقت عبارة عن محفظة تنفتح من هذيك الربطة يلي في الذيل التتوريال

اخيرا اشجع الكل يجرب الحياكة لأنه فوق ما انه يقلل التوتر ويهدئ الاعصاب الا اني لما اشوف الشكل النهائي احس بفرح لا يوصف ان هالشيء صنعته يدي
انا مرات من كارهي الـfast fashion وما احب اشوف قمصان جاهزة مصنوعة بآلات ويقولون عليها انها حياكة، ما اقصد اني اكره عمل الآلات نفسه لكن اكره انهم ينسبون للآلة عمل ما تقدر تسويه
في فرق بين الـ knitting و crochet ، الشي يلي اسويه انا هو كروشي و مستحيل تسويه الالة لأنه يقدر فقط ينصنع باليد

وبس والله احس اني طولت لما اسوي اشياء اكثر مستقبلا بحطها