مدونة متألقة The Ongoing Story | وما زالت الحكاية تروى ♡ (2 زائر)

[Lightless]

لايتو مساحتكِ مرآة لثرائكِ الفكري وجمالكِ الروحي، تعكس عمقكِ وتنوّع شغفكِ.. حقًا من أجمل وأثرى ما مرّ عليّ، دمتِ بهذا الجمال والإبداع.

تم الختم: مدونة متألقة 5-11-2026 | Markiza Hend ♡

محتوى مخفي

ثمة مدونات لا تمرّ عليها مرور العابرين، بل تشعر وكأنك دخلت مساحة صغيرة من روح صاحبها، مساحة تتنفس فيها الكلمات برفق، وتترك في القلب شيئًا يصعب وصفه، ومدونتكِ من تلك الأماكن الجميلة التي لا تُقرأ فحسب، بل تُشعَر .

فيها شيء من الدفء، وشيء من الجمال الذي لا يحتاج إلى ضجيج كي يُرى، وكأن كل حرف فيها يحمل أثرًا لطيفًا من روحكِ، وكل سطر يفتح نافذة صغيرة على عالم يستحق التأمل .

مدونتكِ ليست مجرد كلمات جميلة، بل مساحة جميلة تشبهكِ، وأثر لطيف يجعل المرور بها مكسبًا للقلب .

تم الختم : مدونة مميزة 4 | 11 | 2026 .

- - - - - - - - - - - - - - - - - - - - - - - - - - - - - - - - - - - - - - - - - - - - - - - - -


أهلاً بك في A Bright Chapter حيث تم رسمياً إغلاق ملفات الغموض والألوان السوداء والعناوين الحزينة إللي كانت تصرح بالحزن والنكد والكآبة وإني عايشة بالزاوية
نظرت لنفسي القديمة واكتشفت إني عايشة هالأجواء بصريَا وسمعيًا بس كتابيًا شوية روحي كانت مرحة
لذلك قررت إنه أقضي على هالتناقضات الفنية وأنظف الغبار عن حسابي وابدأ بطابع جديد يشبه روحي الحقيقية تمامًا
شغلنا المكيف وفكينا الستاير والمكان صار مُشرق ومليان تفاؤل وأوكسجين
دايمًا يقولوا إن الحياة تبدأ بعد عمر العشرين (ومرات بعد القهوة ) لكن في مدونتي : الحياة بدأت للتو.


– – – • 彡 • – – –


سؤال جاء ببالي هل سبق وشفتوا حساباتكم القديمة وجاتكم رغبة لتغيير الهوية فجأة ولا بس أنا اللي سويت إعادة ضبط مصنع؟



- - - - - - - - - - - - - - - - - - - - لي عودة - - - - - - - - - - - - - - - - - -
الفهرس :
Chapter 1 =
A Bright Chapter
Chapter 2 =
The Ongoing Story | وما زالت الحكاية تروى ♡
هنا​

 

[Lightless]

❞
كنسلت برامج السوشال ميديا .. حسيت اني في مكان مو مكاني نهائياً.
صارت الدنيا كلها خوارزميات و ترندات واعلانات واشياء ماتعنيني ونهائياً مو اهتماماتي.
وأكثر جزء قواني على التخلي عنهم إنه حتى مااقدر اتحكم بالمحتوى اللي اشوفه وكإنها هي اللي تتحكم فيني
غصب تطلعلي أخبار - مواضيع - إشاعات - تخبييص .. وفوقها يجبروني أشوف إعلانات ​

ابحث عن عالم انا المسؤولة عن انشائه​

واللي صار إني من أكثر من سنتين فكيت نفسي من تعلق السوشال ميديا وقررت أستشعر وأعيش الواقع.
وهالشيء فرق جدًا في جودة حياتي ونفسيتي وذكرياتي كذلك وفرق في مهاراتي الإجتماعية ولقيت إني تدريجيًا أستعدت نفسي.
من الأشياء اللي دائمًا بسببها كان عقلي ملياان بعلامات إستفهام.
إني أجي متحمسة لأشياء كثير أحبها وابدأ فيها وأتحمس وتوصل إني أحط لنفسي نِظام إنه لازم أسويها بشكل يومي.
ومجرد ماتعدي فترة بسيطة أوقف أحس إني مُو قادرة أسويها.
المشكلة برضو ما أرحم نفسي وأتوحش على نفسي وألوم نفسي إنه لييه!! المفروض تستمري .. وأصير أضغط على نفسي لين أعتزل الدنيا ومافيها وأُحبط
وهالشيء ينطبق على أغلب الأشياء إللي بحياتي إلى ماجاء الوقت إللي أُعتبر صرت واعية بنفسي أكثر وصرت أكره الإنتكاسات
أتعلمت حاجة بحياتي : إني ما أضغط على شعُوري وأسمع لعقلي وقلبي وجسمي لما ينبهوني ..
صرت لو حسيت إني مااقدر أرد = ما أرد ، ما ابغى أروح = ما اروح ، لو حسيت إني ما ابغى = أرفض
^ معاكُم وحدة كانت تضغط على نفسها بكل شيء وماكانت تعرف تقول لاء نهائيًا وأتعلمت تقولها بالطريقة الصعبة
^ وترا نفس هالصفة هي إللي خلتني ما أستمر بأي شيء بالدنيا سواءً سوشال ميديا، تعلم لغات، لعبة، أتفرج أنمي ، .... أي شيء.
ونفس الشيء كنت جالسة أسويه بأنمي تون أجي مندفعة وأختفي في يوم وليلة.
لكن هالمرة مختلفة لإني ما جبرت نفسي أسوي مسح ضوئي لكل شيء جآلسة أخذ كل شيء حبة حبة وأتصفح المواضيع وأتفرج وأشوف لدرجة حسيت كإني مستجدة بعالم المنتديات .. سابقًا كُنت أسوي إحتلال وأجلس طول اليوم أرد وأزعج خلق الله بالرسايل وما أسيب أحد وكلها كم يوم وأختفي للأبد تخلص طاقتي كلها
ولاحظت لما عدت السنين إني من يوم ماصرت أرسم حدود لنفسي وما أوصل نفسي لمرحلة الإحتراق بعدها ماعمره جاتني إنتكاسة وعايشة بخير ليومكم هذا .. > ترا لحظة الادراك جاتني قريب
رُغم إني ما أقدر أجلس طول اليوم على الجوال والشاشات > ممنوعة عشان بنتي لسا عمرها سنة وما أبغاها تتعود ولعله هالقرار حماني قبلها وخلاني أشوف العالم بحقيقته لكن رغم كل هذا : قدمت على الجامعة ، طورت من لغاتي البشرية ومازلت أطور وأتعلم بشكل يومي ، بأتعلم لغة بايثون ، اقرأ بشكل يومي،.....
معنى كلامي إني أكتسبت مهارة إدارة الطاقة والأشياء اللي كنت أحاول أجبر نفسي عليها وأفشل بكل مره صرت أسويها دحين بسلاسة وراحة وبدون ما أحس بإرهاق.

- - - - - - - - - - - - - - - - - - - - - - - - - - - - - - - - - - - - - - - - - -

المغزى من كل هذا إنه الحياة مو سباق أو إنك تحتاج تثبت شيء للآخرين و السعي الحقيقي والدايم هو اللي تسويه وأنت متزن و هادي.
من تجربتي صرت أؤمن إنه الاندفاع العالي والركض المفرط غالبًا يخفوا وراهم احتراق مستخبي .. الإستمرارية الحقيقية تنولد من الرفق بالنفس.
يعني لما تتعلم كيف تدير طاقتك وترسم حدودك بوعي وتلبي احتياجك للراحة قبل تصيبك نوبة إحباط؟ حتكتشف إنك تقدر توصل لكل أهدافك بس بقلب مطمئن وبدون ما تخسر نفسك بالطريق .. يعني بالمُختصر توصل بكبرك كااامل قطعة وحدة مو تلقى نفسك تارك نفسيتك ولا عقلك ولا بالك بالطريق.



彡


يارب أشوفكم كلكم واصلين للي تتمنوه ببال هادي وقلب مرتاح و من غير تعب ولا ركض يُنهك أرواحكم



❤❤❤❤❤❤​

 

[Lightless]

مساء الخير
اليوم حسيتني مرررة مستجدة
حقيقي مخي معلق على سستم المُنتديات القديم
لإني كُنت مستغربة ليه مو قادرة أشوف جميع ردودي وجميع مواضيعي السابقة
كُنت كل مره أحاول أكتشف وأقلب بالصفحات عن طريق ملفي الشخصي -> المنشورات+النشاطات
صدمة حياتي لما أكتشفت إنه تحت كلمة المُنتديات فوق أقدر أشوف كل شيء > الآن في هذه اللحظة أكتشفتها

وحتى الرسايل الخاصة قُلت شكله هالخاصية تم إلغاءها إلى أن وصلتني رسالة وأستغربت ماعرفت أرجعلها
واليوم برضو صدفة أكتشفت فين مكانها

يعني كل شيء قدآم عيني بس أنا مخي مبرمج على ماسبق
المُهم مرره أنصدمت إن كان عندي مواضيع سابقة غير المدونات > أكتشفت إنه عندي 4 مدونات سابقة
والمواضيع إللي أكتشفت إني مسويتها طلعت أصمم وأسوي تصاميم ورمزيات وخلفيات وحركااات
حقيقي ناااسية نفسي
وفتحت الهاردسك القديم أقلب فيه ولقيت عندي ملف موجود إسمه فوتوشوب وقُلت خليني أخذ نظرة على اللي فيه
طبعًا ماعاد محملة الفوتوشوب من سنييين فأغلب الملفات pds ماقدرت أتطلع عليها لكن فيه صور معينة
وشوفوا الصدمة إيش لقيت بين الملفات

لقيت ملف إسمه بإسم المنتدى بالضبط
فكيته وأخذت فكرة عن تصاميمي لازم أوريكم
هِنا + هِنا
^ هذول هيدرات مدوناتي السابقة
مررره نفسي أرجع أفتح وأصمم .. أتذكر حُب حياتي إني أدمج بالخامات ..إذا ماخاب ظني كذا إسمها
بس الآن مُحتارة .. أصمم بالفوتوشوب وأرجع ولا أكتفي بالكانفا ..
طبعًا كان تفكيري سابقًا إنه المصمم إللي يصمم من الصفر ويسوي كل شيء بنفسه ولكن أكتشفت إن الدنيا أتغيرت
بمناسبة إني كُنت فاتحة خدمة تصميم سابقًا وكُنت أخذ عليها مبالغ وكان زمان حقيقي كل شيء من الصفر ما أستخدم شيء جاهز
كُنت أخذ ساعات وأيام عشان أنجز تصميم واحد!! مرره كُنت دقيقة وحريصة بطريقة موسوسة.
وكُنت أستخدم الإليستريتور عشان أرسم الأشكال والقوالب إلي أحتاجها بعدين أنقلها للفوتوشوب وأكمل
ومرره كُنت أتعب نفسي ويمكن أنا بالغت شوية
وفجأة أكتشفت فيه ناس بيبيعوا تصاميمهم بأسعار عالية ولما أخذ فكرة عنهم أنصدم إنهم مسوينها بأقل مجهود وكلها قوالب جاهزة زعلت ليش ماشغلت عقلي
أستوعبت قديش الدنيا أتغيرت وسهل تلقى أدوات وأفكار وخطُوط و طُرق معينة تسهلك التصميم
وغير الـ AI إللي بالفعل يصمم صورة خلال ثواني .. ما أتوقعت بيوم إن حيصير فيه ميزة في يوم وليلة بهالطريقة
بس أنا شخصيًا ما أفضل تصاميم الذكاء الإصطناعي لكن لاحظت كثيير يستخدموها
أحس شوية شوية المصممين حيصير مالهم وجود لكن دام إنه شيء أحبه ونفسي أسويه وأنبسط فيه حسويه من غير تفكير
إللي يصمموا فضلًا قولولي بتصممو بأي برامج ؟ > أحس فاتني كثير لايكون فيه برنامج مااعرف عنه
عشان أتحمس أرجع


ماتدروا قديييش نفسي أهرج وأهرج وأهرج بس مو عارفة ابدأ من فين ولا أقول إيش أول >
لكن مبسوطة هاليومين أحس جالسة أتعرف على كل شيء حبة حبة وجالسة أستكشف التون على مهلي
لما أجي أتفاعل أكون جالسة أتفاعل من كل قلبي ومو جالسة أسلك الصراحة
سعيدة بهالعالم جدًا وأحسه هالفترة متنفس لي


لي عودة لمّا أثبت على هرجة أجي أقولها ​

 

[Lightless]

❤❤❤❤❤❤

السَلام عليكُم جميعًا
صارلي كم يوم مُتحمسة بالمنتدى وأفرفر فيه وأطلع مواضيع من تحت الأرض > مرره أندمجت
نسيت إنه المُنتدى أصلًا يُعتبر متخصص بالأنمي وعنده تقارير وأوبديت أول بأول عن الأنميات
طبعًا أنا ماعندي أي أنمي أتفرجه جديد مقضيتها إعادات للحاجات إللي أحبها وصارلي فترة طويلة ما بتابع جديد نهائيًا
خصوصًا بالبيت الفترة هذي تُعتبر حساسة لبنتي ( عمرها سنة وشهر) -عشان ماينفع تتعود عالشاشات- : (
طول وقتي لو بتفرج أفتح مسلسلات مصرية-إنقلش-كُوري بمناسبة إني أقدر أفهم وموضروري أتفرج بعيني على ترجمة و أحط سماعاتي الإيربودز بإذني وأعيييييش اليوم مع بنتي بدون ماتحس أو تنغري للشاشات > كيف بس ؟ فنانة مو ؟
طبعًا أكتشفت هالطريقة بالصدفة من كُثر الهُدوء إللي كان يتخلل حياتي
ونوعًا ما مليييت مررره وبنتي أخيرًا صارت تنام شوية بطريقة مُتواصلة يكون عندي ساعتين ثلاثة باليوم أجي أجري بالتون و برضو أحاول أسوي كل شيء نفسي فيه
و فجأة طحت بتقرير جنني حقيقي رجعني لحماس إني أتفرج أنمي
هذا التقرير Victoria of Many Faces وهُو يعتبر البداية حقت الحماس ، حملت كُل الحلقات وجآلسة أتفرج حلقة بعد حلقة
كُنت بتفرجه أونلاين عشاني جالسة أجبر نفسي أتفرج كل لغة ما أفهمها بالترجمة الإنقلش ، ولو بتفرج كوري أتفرجه بالكورية > عشان قلك أتطور وأنهلكت من الإعلانات وبنفس التقرير ماشاء الله عرضت الحلقات ولما بديت أتفرج الترجمة بالعربي رجعتلي مشاااعر مره وحشتني من زمان عنها
ويادوبك بأتفرج هالأنمي وأطيح عالتقرير هذا شرارات من الماضي، وحلم يضيء الغد | Sparks of Tomorrow
أتدمرت من الحماس والله كل واحد أحلى من الثاني وكلهم يحمسوا ويجننوا
^ هذي قصة عودتي لمُتابعة جديد الأنمي
و اليوم كمان أحسني مررة مُتحمسة أسوي موضوع وأستغل الحماس حقي بس فعليًا ماعندي أفكار نهائيًا : (

- - - - - - - - - - - - - - - - - - - - - - - - - - - - - - - - - - - - -

فيه موقف جاء عبالي وحابة أحكيه
قبل يومين جاتني قريبتي البيت ووسط الجلسة والهروج والسواليف إللي ماتخلص شافتني ماسكة لابتوبي وجالسة أقلب فيه وأهرج معاها .. أنتبهت إنها للحظات كانت تتأملني بطريقة لبسي وبجلستي وبالأجواء إللي أنا صنعتها لكن طنشت .. وفجأة قالتلي : كإني رجعت سنيين ورا وكإني جالسة أشوف ساره إللي دايمًا كُنت أشوفها في طفولتي زمان !!!!
.. خلتني أسكت وأفكر بعُمق ..
حقيقي و فعلًا أنا كُنت كدا كان طول وقتي قدام اللابتوب ولحالي بغرفة وإضاءات خافتة وهدُوء وإللي كُنت أسويه طول حياتي السابقة بس الفرق سابقًا إنه كان هروب من الواقع وانشأت عالم إفتراضي وللأسف إني أول ما أنشغلت بواقعي أنهد هالعالم وماعاد له وجُود نهائيًا .. وبالنسبة لي هذا درس ما ينفع أكرِّرُه نهائيًا
بس حبيت أهرج وأفضفض لسا مابديت الجد


❤❤❤❤❤❤​

 

[Lightless]

- - - - - - - - - - - - - - - - - - - - - - - - - - - - - - - - - - -

-كتبت تدوييينة طوييلة وبالغلط كالعادة بنتي جلست تضغط بالكيبورد والله أعلم كيف قفلت الصفحة كاملة .. حتى ما أنحفظت كمسودة -



أعطوني دقائق من البُكاء فضلًا والله مره أنقهرت



-عُدنا -



فداها العسل
❞
كُنت بتكلم عن إني أول مارجعت للتون وحبيت أظهر بشخصيتي الجديدة وأقشع السواد اللي كان مُحيط بي نظرت لإسمي أول شيء و طبعًا إسمي لايليس معناه الظلام أو العتمة .. وهذا لحاله أكبر نكد
فأول شيء جاء ببالي إني أغير إسمي .. وجيييت جري أبحث وطلع مافيه شيء مجانًا وضروري يكون عندي تونات في عززز ما أنا مُفلسة فطلع إنه ما باليد حيلة فأستعنت بإني أغير هالة النكد إللي حولي > هاااه تراني فلة لايغركم < فسويت مُدونة بطبع جديد وركزوا عالإسم A Bright Chapter || الحياة بدأت للتو وكتبت تحت إسمي A star who shines in its own light يعني إنه هااااه شوفوا العمق كيييف المشكلة حسيت بكمية تناقض ماشفت العمق وجالسة هالفترة أجمع تونات ع أساس أغير إسمي بالقريب العاجل
طبعًا أنا إسمي ساره وقضيت طفولتي ينادوني سُكر إلى ما كبرت ليومكم هذا وصحباتي قاموا بتحوير الإسم إلى سكاكر فكانوا هالإسمين ببالي إلى ما شفت خلال هالفترة عضوتين جُدد -سكر وسكاكر بحق وحقيقة- بنفس الإسمين فالآن لازم أشوف خطة ثالثة
نفسي أخذها فرصة أفضفض > ماصدقت
أنا كبرت وأنا ما أحب إسمي وكُنت أنتظر اللحظة إللي بالفعل أغير إسمي إلى سكر لإني أحسه حقيقي إسمي .. سبب كرهي هُو سبب التسمية لإنه ماسموني على معنى لكن سموني على إسم بنت مغني الوالد يحبه وصديقه وبمناسبة إني شخص عميق أحب المعاني وأحب دايمًا أشوف أسباب التسمية ومره أستمتع بهالقصص ماحسيت بقيمة إسمي نهائيًا ودايمًا أحس ساره ماينفعلي ومو هو إسمي
وكُنت طول الوقت عندي ألقاب وأسماء ثانية كل فترة أسمي نفسي فيها بالعالم الإفتراضي ( يورين ، GS ، باندا ، سيرا ، STN ) .. والقائمة تطووول وحمدلله نسييت الأسماء الباقية
وجاء وقت مُعين حاولت أتصالح مع إسمي لكن الواقع ما أسعفني ..
خليينيي أقلكم لييش .. طبعًا إسمي موجود بكثرة بكل الدُول وبكل مكان .. حتى كثيير بشغلي كُنت أتقابل مع أمريكان وفلبينيين وكوريين وكلهم اسماءهم ساره على حظي الدنيا مرره صغيره تجمعني مع السارات بكثرة
وفترة دراستي بكل فصل كُنت فيه عالأقل كان فيه 4 سارات غيري ( وصلت مرة لين 8 سارات ) .. طول حياتي يتلخبطوا بيني وبين السارات وطول حياتي ينادوني بإسم العائلة أو الوالد عشان مايتلخبطو .. غير إنه دايمًا أنحط مع السارات الشريرات
مره اتهزأت بسبب ساره لإنه وحده أشتكت على ساره من غير ماتحدد أي وحده وساره المقصودة جحدت وأنا أكلتها
ونفس الشيء بالشغل جاني أيميل من الأوبريشن وكان محتواها غير مبشر بالخير وطلع يقصد ساره ثانية > الله يعين ساره المقصودة بس هي كانت متعمدة لما سألها بالإجتماع مين إنتي أعطته إسمي عشانها خربتها
ومرة لقيتني ناقصة 20 درجة بسبب المعلمة لخبطت بيني وبين ساره !!! أعطتها درجاتي وأعطتني درجاتها
والله أقل ما أقول عن السارات إللي صاحبتهم شياطين حتى إللي قلت عنها أخيييرًا سااااره كويسة برضو صدمتني
تدروا شكله المشكلة فيني لإنه مو معقول>
مرات أحس فيه لعنة معينة بيني وبين الإسم .. وعشان أصدمكم الصدمة التأكيدية إني أتزوجت وطلعت زوجة أخ زوجي إسمها ساره برضو
المُهم إني قضيت أغلب حياتي أعافر عشاني مو حابة الإسم ولما جاء وقت الجد إللي كُنت فيه متوجهة للأحوال المدنية > جهة حكومية < عشان أشوف إجراءات تغيير إسمي جلست أفكر من عِدة زوايا ..
لو أشوفه من زاوية إنه إسمي مررة سهل وموجود بكثرة خلينا نقول عنه إسم عالمي وعابر للثقافات وأغلب لغات العالم ساره جدًا نطقه سهل وسلس > أنا ما أحب الأسماء المُعقدة بنطقها وأحب السلاسة عامًة حتى بنتي إسمها أسهل من إسمي بالذات مجالي وحياتي وتعلم لغاتي كانت هالنقطة تهمني مرررة فأخذت نقطة ووقفت إنه لازم أفكر أكثر .. مُجرد خيالي كيف بشغلي حينادوني إدارتي الأجنبية بـِ سُكر بالإنقلش أو الهندي سدتلي نفسي
وأنتهى نقاشي مع نفسي إني تقبلت إسمي جدًا ومتعاملة بسكر وسكاكر كدلع أكثر .. ماصارت تواجهني ضيقة من الإسم سابقًا لإني أكتشفت السبب في الشخص إللي سماني وكُنت رابطة الإسم فيه إلى ماتحررت وتقبلت إني ساره ومالي دخل بأحد وأنا مو إنسانة جاية الدنيا عشان أنحط بقالب مُعين .. أنا إللي أصنع قالبي بيدي وأعيش بالطريقة إللي أشوفها تناسبني
لكن حتى لو جاتني رغبة لتغيير إسمي مُستحيل أوقف نفسي وحسوي إللي أبغاه .. عشان أتحررت من الشعُور حقيقي كُل شيء أتغير معايا
فضفضت ليييين ماتعبت .. هيا دحين لو بغير إسمي بالتون إيش أختار ؟


彡


صح أمس سويت أول موضوع لي بالتون
حين يتحدث الغموض بصوت خافت || نقاش
لو تدروا عن كمية اللخبطة إللي أتلخبطتها بأحجام الصور وكيف حاولت أرتب الموضوع .. الصراحة أهني إدارة التون إنه كيف جعلوا الدُنيا سههلة .. حتى لو الصورة كبييرة مره أكتشفت إني أقدر أرفقها وأعدل بحجمها! ماشاء الله هذي المميزات كانت مافيه زمان ولا بأي منتدى وأصلًا حتى حلم ماكنا نحلم فيها كإنه شيء مُستحيل يكون موجود
بس فكرة الموضوع كان نقاش وكلام جاء ببالي وقُلت ياااويليييي لو مانزلت الموضوع .. على طول فتحت الوورد ورتبت الفقرات وحاولت أخلي الفقرات شوية كثيرة عشان أتفلسف على راحتي وأخلي المُوضوع ممتع و يمكن هذا أرتب موضوع أسويه بحياتي في منتدى ومرره مبسوطة مني
حتى الهيدر الصراحة هُو من التصاميم القديييمة إللي لقيته عندي لكن مررره عدلت عليه وشلت ملامح التصميم الأول > لو سويته من جديد أبرك


❞

وبس والله.. هذي فضفضة السريع السريع قبل لا بنتي تقفل اللابتوب مرة ثانية وأرجعلكم هالة النكد وأغير رأيي
وخلاصة القول يا أصدقاء سواء كنت لايليس أو سكر .. المهم إني عايشة وأكتب و شارل بوكوفسكي يقول شي وأنا أقول شي ثاني: الحياة أقصر من إنه نقضيها بأسماء لا تشبهنا ياجماعة ... بس لو فيه تونات ماتحتاجوها استقبلها بصدر رحب و ما أقول لا



- - - - - - - - - - - - - - - - - - - - - - - - - - - - - - - - - - - - - -​

شكراً لإنكم وصلتوا لين هنا ​

 

[Lightless]

❤❤❤❤❤❤
- - - - - - - - - - - - - - - - - - - - - - - - - - - - - - - - - - - -

السَلامُ عليكُم ورحمةُ الله وبركاته
أخباركم ؟
كعادتي أغيب شويات عن مدونتي وأرجع بفضفضة وحكاوي ياطولها > تقولوا كاتبة مقال
تدوينة الآن كلها عن التون

الفترة السابقة بهالشهر عملت مُوضوعين جُدد كمان غير السابق حين يتحدث الغموض بصوت خافت || نقاش ^
فمُوضوعي الأول عائلة غير تقليدية تكسر قواعد الحكاية | تقرير عن الأنمي Ibitte Konai Gibo to Gishi [ فعالية أنميات الصيف ]
يُعتبر مشاركة لفعاليات الصيف .. كُنت مستحيل أشارك لإني مودارية أصلًا ايش صاير وكُنت أشوف فقرة البحث والفلترة عن الأنميات شوية صعبة لييين جلست أقلب في التورنت ولقيتني منزلة أول حلقة من كل أنميات الموسم > لو قد سمعتوا عن المثل حق ( يا أطخه يا أكسر مُخه ) أنا طبقته بالمعنى الفعلي
وبالفعل لقيتني خلال يومين آخذة فكرة عن كُل الأنميات وعرفت ممكن أتكلم عن إيش : (
وبدون أي شعُور شاركت ورحت بحماااااس شديد أجهزله وأخترت يكُون تقرير معقول ( ما أدبش كل المعلومات) كبداية عشان أخذ فكرة عن التنسيق والترتيب وإيش ينقصه .. وعملت المُوضوع وأنتهى.
و أتوقعت أنتهت القصة وخلاص حرجع لحياتي الطبيعية بالتون كعضوة تفرفر وتعلق وتشارك فيه
وفجأة لقيت قسم عالم الفن و الأنميشين وأستغربت إني ما أنتبهت للقسم هذا عشان أنا مرررة من إهتماماتي وأكتشفت إني ماعرفته عشان مافيه مواضيع جديدة فيه .. و بس لقيت موضوع واحد لهالسنة وكمان مافيه تفاعل فيعتبر مافيه أوبديت على كُل شيء وفي لحظة جاتني فكرة المُوضوع بسبب إني حابة أنعنش القسم
أنا كإنسانة كانت عندها هوايااات كثير وإهتمامات كثييير لكن كانت دائمًا مُشكلتي بواقعي ماعمره أحد شاركني لكن برضو كانوا مايتركوني أستمتع وكُنت أتعرض للإنتقادات طووول حياتي إلى أن أنخنقت و غادرتهم بالمعنى الحرفي > أنكتمت
فمن صُغري كان دائمًا مهربي ناس إفتراضية ما أعرفهم لكن يشاركوني جُزء بسيط من إهتماماتي ( يعني حقون الأنمي بس أنمي لكن مايهتموا لشيء ثاني وحقون الكُتب بس كُتب , وحقون الدرامات بس درامات ,,, وهكذا ) وكان بالنسبة لي هذا كافي أقل شيء فيه أحد > حزنت على نفسي وأنا أحكي لإني أتذكرت قديش كُنت متشتتة بين الناس
والتون كان بالنسبة لي باب مررره حلو كُنت أشارك إللي أعمله وأتكلم عنه بمدوناتي وكان شيء مرره حلو بالنسبة لي
و آخر السنوات بالمعنى الحرفي أنكتمت لإني نسيت التون اصلًا إنه موجود وأحس في جُعبتي أشياء كثييير ماعُمره جاتني فرصة أشارك وأتكلم مع أحد و مريت بفترات كان نفسي أتكلم عن دراما مثلًا وأشوف أحد يسمعلي أو أتكلم عن قصة أنمي وأحد يكُون مُهتم ومرات عن الفرق الكورية والأفلام و الكُتب واللغات و و و و والقائمة تُطُول حقيقي لو أتكلم ما أخلص ..
فمن الأشياء إللي أشوفها خيرة لعودتي للتُون إني حقيقي حأقدر أخرِّج مافي جُعبتي وحعامل التون كَـ ثيرابي لنفسي
وتم المُوضوع الثاني: رحلة النجومية والاستقلال | تقرير شامل عن Ji Chang Wook
وحقيقي حاولت أجتهد وأخلي المعلومات مُرتبة .. تعبت مع إنشاء الجداول بالتون لإني مثلًا ما أقدر أحدد الجدول كامل وأعدل على تنسيق النص .. لازم خلية خلية فأنتقلت لفقرة الأكواد وجلست ألعب فيها وأزبط الجداول > أنبسطت بالنتيجة وأكتشفت قدييش صار سهل علي
بمناسبة إني ستوكر مُعتزلة وكُنت أقدر أترصد للناس وأطلع حساباتهم وأِشياءهم ومعلومات عنهم وأي دليل مُوجود بالنت عليهم > فأستخدمت هالمهارة مع المُمثل نفسه
وفي النتيجة لمّا جلس أقلب في موضوعي وأعدل كلمسات نهائية حسيت باقي أحط عنوان بيت الممثل من كمية المعلومات إللي حطيتها عنه
تخلييييد للبنرات حقت المُنتدى اللي فيها 3 مواضيعي كُلها
مررره أنبسط كل ما أشوفها

❞

أنا بالفعل جالسة أحس بإمتنان فظييع للتون من يوم مارجعت ونفسي أسوي فيه أشياء وأبغاه يستمر وماينتهي زي غيره فبالنسبة لي أبسط شيء إني أرد على المواضيع وأتفاعل معاها لإني ماكُنت مهتمة بإني أنشئ مُواضيع بالبداية نهائيًا
و حبيت إنه فيه فعاليات بأقسام مُعينة والكل يشارك ويتفاعل وهمّا إللي حفزوني أنشئ مواضيع
وكمان صرت مشاركة بمُوضوع التميز هِنا وصرت أدخل الأقسام وأرد ومرتبة الردود وعددها للشهر ومتحمسة
وأكتشفت فجأة موضوع المهمات هِناوفجأة خفت إني أرد على كل شيء وصرت أحط بالإشارات المرجعية وأوفر المواضيع لردود ومهمات شهر 10 > مو معقولة حخلص كل شيء هالشهر ومايبقى لي شيء أشارك فيه لمهمات الشهر الجاي > مره ذكية وتفكر للمستقبل المُهم إني هديت نفسي وخليت كل شيء حبة حبة وحطيت حد لعدد ردودي بالشهر بناءًا عالمواضيع الموجودة و عالمهمات
أيضًا أنا كشخص صار يعرف شخصيته تمامًا فَـأعرف إني مُمكن أمل لما ما ألقى شيء أسويه بالموقع ويخف وجودي كثييير
* طبعًا كل الشكر للي صنع خاصية الإشارات المرجعية .. أقسم بالله كل مره أنبهر *
وإن شاء الله الفترات الجاية يكُون فيه تفاعل والحماس أكثر ..
سعيدة إنهُ مازالوا فيه أعضاء جُدد وبيتحمسوا بالمنتدى
أنتظروني في تدوينة جديدة مالها فايدة بس عبارة عن حكاوي وأتحملوني


- - - - - - - - - - - - - - - - - - - - - - - - - - - - - - - - - - - -​

 

[Lightless]

❤❤❤❤❤❤
- - - - - - - - - - - - - - - - - - - - - - - - - - - - - - - - - - -

السَلامُ عليكُم
اليوم حابة أتكلم عن قائمة الأنميات إللي جالسة أتابعها وحملتها كلها حتكلم عن جزء وبعدين حجي أزعجكم بالباقي
ححط أساميهم بروابط تقاريرهم المُوجودة حاليًَا بالتون وححكي عن كل واحد وأطلع مافي جُعبتي
* ترا ممكن أكون جالسة أحرق ففضلًا إللي يتفرج الأنميات دي ينتبه * ​

​

The Ogre’s Bride​

من الأنميات إللي شفت قصتها وما أتحمست ( بس شفت البوستر والقصة مكتوبة بإختصار شديد ) وبعد ماطحت بالتقرير أنصدمت لمّا شفت التفاصيل إللي ماكنت أعرفها وهي إللي تُعتبر تحمس مره وطبعًا أنا لقووفة رحت شفت التريلر ومرره أتحمست أتفرجه.
ندمت إني ماشفته من قبل شيء يجنن .. يعني الرسم مرره يجنن وحلو التباين إللي يعملوه في اللحظات السيئة والله تعيشوا اللحظة بسبب التلاعب بالتباين وتحسوا بكل المشاعر وهالشيء مررره بطل وحبيته.. صح حتى الأوست حقه يجنن .
طبعًا العمل فيه عدة مخلوقات غير البشر الأوني أو الشياطين .. والشياطين أو الأوني لهم أنواع ( شياطين القط , شياطين الثعالب , الغيلان ) وطبعًا الغيلان يعتبروا أقوى نوع.
بداية العمل لمّا البطلة (يوزو) أهلها يعاملوها اسوأ مُعاملة ومفضلين أختها عنها بأبسط تفاصيل الحياة .. طول الحلقة وأنا متنرفزة وحزنت معاها وتقريبًا باقيلي شوية وأبكي خلتني أسترجع مشاعر ما أحبها .
ماقهرني غير خطيب أختها (الشيطان الثعلب) لمّا حرقلها يدها قدام عيلتها ومحد لا أبوها ولا أمها ولا حتى أختها وقفوه ..

وبعدها سحبوا نفسهم وكملوا اليوم من غير مايفكروا فيها وهل هي بخير؟ -عورولي قلبي -.. وفوقها قالو له سوف نوبخها > يبغالهم جلد .
وجات بعدها لقطة لحظات اليأس إللي كانت تعيشها يوزو وهي ماشية لحالها بالليل وحالتها حالة بعد الحادثة هذي ويدها محروقة.

طبعًا بطلنا من شياطين الغيلان > أكيد لازم يكون أقوى واحد ظهر فجأة ودخل أحللى دخلة في الحلقة وقلها أخييرًا لقيتك و أختارها عروسه .

ومن الإقتباسات إللي عجبتني :

فنان ^ طول الوقت أنتظره يروح يحرق بيتهم .
لما قررت تسيبهم قهرتني أختها مرررة لما جات تعطيها أغراضها وتقلها أصلًا خروجك من البيت مافرق معانا وإنتي لاتنتمي لهالمكان اصلًا .. يووه يالوجع : (
إللي حلو بالأنمي الجد والجدة إنهم واقفين مع يوزو .. لدرجة حتى لما قالولها يوزو ضربت أختها من غير أي تفكير قالوا أكيد فيه سبب هي ماتعمل كدا بدون سبب يعني يثقوا فيها مرررة لهالدرجة .

وهذا أكبر مثال عالعائلة السامّة : بنت جآلسة تتاكل حُقوقها وتنضرب وتتبهدل ويتم إهانتها بشكل دائم وتفضيل أختها عليها وكرفها مقابل راحة أختها .. ولما جا الوقت إللي أتآذت منهم وقررت إنها ماتجلس بالمكان هذا ورفضت تجلس بهالمكان وتقول أنا ما أنتمي له .. وبين ما كان فيه نقاش جالس يدور حول هالبنت بين الجد والجدة والأم والأب : ( شوفوا ردة فعل العيلة (الأم والأب) إللي ينقال عنهم عايلة :

وطبعَا بردلي خااطري لما أنتقم من خطيب أختها إللي حرقها وحرقه أشد حرق أخيييرًا .

ومررة تحزن البطلة بسبب معاملة عايلتها طُول الوقت تحس بخوف وعدم أمان وشك إنه ممكن هالحاجات الحلوه حتروح بأي لحظة .
حتى لما قالت أخاف أعتمد عليه بشكل كلي وبعدين يسيبني وما أعرف أعيل نفسي : (

حبييت تطور الأحداث جدًا بالأنمي هذا وحسيت فيه فلسفة عميييقة بهالأنمي الإنسان يزهر ويتغير على حسب المكان والبيئة إللي هُو فيها .. يوزو كانت تحتاج أحد يحبها ويشجعها ويكُون معاها زي ما هي مو لازم تتشكل على كيف أحد عشان يحبها.
والمُفارقة الحلوة بالشياطين أو مخلوقات الأوني بين المعروف وبين هالأنمي إنه أول مره أشوف عمل يطلعهم كمخلوقات جيدة بالعادة الأسطورة حقتهم إنه عبارة عن كائن مُدمر! ففكرة إنهم أظهروه بهالطريقة كاان مررررة مُمتع إللي أقدر أقوله إني أنصح به وبشدة لدرجة ما أبغى أخلص الأنمي وشكلي حبقي كم حلقة .

​

My Stepmother and Stepsisters Aren't Wicked​

طبعًا أنا صاحبة التقرير .

الأنمي برضه كسر كُل الأفكار التقليدية وبدل ماتكُون زوجة الأب وبناتها مُعذبين للبطلة طلع إنهم مرره ناس جيدة .
مُشكلة زوجة الأب تفجع بطريقة مو طبيعية الصراحة والله شكلها وصوتها يخووف لو تعرفوا صوت أوروتشيمارو من ناروتو كيف كان ؟ هي نفسها مؤدية الصوت.

الأنمي حلو كتغير جو بس لكن مايُعتبر فيه حبكة وشيء مُعين الواحد يشده .. مُجرد أنمي حق وقت الإسترخاء والكوميديا البسيطة .

Goodbye Lara​

نجي للأنمي الفنااان إللي كشيت منه بالبداية قلت ناقصين قصة إيريل ؟؟ لكن بعد ماشُفت المفارقات طلع مو نفسه وفيه فرق بينهم أتحمست أتابعه وماندمت .

فيه إللي يقول نفس إيرييل .. لو نفرق بين لارا وبين إيرييل :
لارا : هي حورية بحر ماتت بعد ما أتحول حبها إلى حسرة وتتحول لـ زبد البحر!! -صدمة-. لكنها تُبعث من جديد في اليابان الحديثة كفتاة بشرية وتقابل نفس الرجال اللي حبته وسبب في إنها أتحولت لزبد البحر.
^ يعني لارا قاطعة للأمل ومأسوية من البداية .

إيريل : حورية بحر تتنازل عن صوتها عشان تصير بشرية وتكسب قلب الأمير ولو ماكسبته حتصير أسيرة عند الساحرة أرسولآ.
^ طبعًا إرييل كُنت أموت فيها طول حياتي إلى ماكبرت واستوعبت القصة وشفتها قديييش قصة سيئة وماتستاهل ..

فكرة العمل هذا لاحظت إنه مركز على فكرة الفرصة الثانية وحبيت مجرى الأحداث بهالطريقة.
لارا بنت مالك البحار هذا :

و الساحرة الشريرة هي أخت الملك هذي :

طبعًا كالعادة الممنوع مرغوب وبعالم البحار ممنوع إنه فيه أي شيء يخص البشر ومحرم إنه الحوريات يقربوا من البشر ولارا كان يجيها فضول دائمًا على عالم البشر إلى ما أبوها تعب وهو يحذرها وحطها بالسجن > > وطبعًا دور العمّة الساحرة تغريها ونجحت بالإغراء إنها تخليها بشرية لكن برضو بنفس الجزء حق إيرييل إنها تاخذ صوتها!!! > مرره يقهر هالبارت < .. لكن مقابل إنها تلقى الحب الخقيقي .

ولمّا جات خلاص تلقى حبها الحقيقي أتحولت مباشرةً لحورية قدامه .. وهذا اللي حصل :

للأسف رفضها أشر رفضة .. يعني مو بس الحوريات إللي في عالم البحار يحتقروا البشر طلع حتى عالم البشر يحتقر الحوريات.

فقرة الموت حقتها حزنتني : (

الموقف هذا خلاها تقول إنه الجميع كاان مُحق بخصوص البشر..البشر سيئين.
وللأسف الساحرة تقريبًا سيطرت على أبوها واللي معاه وهجرتهم من مملكتهم لمكان ثاني وحطتهم في سُبات عميق ....

ولمّا صحيت لارا بعد سنيييين لقت بالذكريات أبوها قلها : مهما كان ذنبك عظيمًا إلا أني أُحبك > دمووووووووع .

وقالتلها الساحرة إنتِ الوحيدة إللي حتقدري تيقظيهم من سباتهم وحطتها بإختبار ورجعت أنبعثت كبشرية في عالم البشر.
على بالكم الساحرة سابتها بحالها بعالم البشر ؟ طبعًا لا وهذا جُزء منها على هيئة سمكة عشان تراقب لارا كويس.

ومن صدمة حياتي إنه أختها برضو طلعت بعالم البشر بعد هالسنييين!!!!

حزنت على قصتها وكُنت مستغربة تأكيدها على كُره البشر بشدة غريبة .. طلع إنه تم إصطيادها كحُورية وإستخدامها للإستعراضات بعد إنهيار مملكتهم : (

وباين فيه أسرار خفية لسا ماوصلت لها لكن حلوه فقرة لارا وهي تحاول تندمج مع البشر .. وما أعرف حتلقى أختها ولالا : (
وطلع من الأشياء إللي ساعدتها على الرجعة للعالم بعد ما أتحولت لزبد البحر إنه أبوها خلص آخر طاقته من النور وأعطاها بنته : (

طرح العمل هذا سوداوي وطرح فكرة الفرصة الثانية وهي محمّلة بآثار وأحزان الماضي بدل من أنها تكون مجرد حياة وردية .. هالنقطة مرره معقدة ونجحو فيها حقيقًة .
من الحِكم إللي قدرت أستخرجها من هالأنمي إنه لارا ما أحتاجت تبدأ على صفحة بيضاء نهائيًا هي بدأت من محل ما أنتهت وعملت بداية جديدة : البداية الجديدة لا تمحو الماضي بل تبنى على أنقاضه.
وعلاقتها بأبوها قدييش أسرتني أحب أشوف هالنوع من المشاعر بين البنت وأبوها.
يعني تم رفض البشر للارا مجرد اكتشافهم حقيقتها وتجريدها من إنسانيتها تماماً وبين كلمة أبوها الأخيرة رغم كل إللي عملته : مهما كان ذنبك عظيمًا إلا أني أُحبك.
هذا الدرس يحط الأمان العائلي والحب الخالص الغير مشروط في كفة والمشاعر العابرة المسكونة بالسطحية في كفة أخرى.
بالنسبة لي أشوف إنه هالعمل يذكرنا بانه القبول الحقيقي هو الذي يتقبلك بكسورك وحقيقتك ومو إللي مايتقبلك إلا لمّا تتنازل عن صوتك وهوّيتك لتناسب عالمهم ..
و إختصارًا للأنمي هذا يوضح النضج بعد الانكسار .. ومواجهة تبعات خياراتنا بكل شجاعة .
مرره حلوه الأحداث يمكن بس الرسم حق الأنمي ماعجبني حسيته غريب ومافضلته الصراحًة .. لكن مجملًا عمل الأنمي هذا مرررة حلو .

Always a Catch​

^
هالعمل يجنن .
شخصية البطلة هبلة مرة أحب مررة تغيير الأجواء بهالطريقة الكوميدية إللي تخلي الإنسان حقيقي يحس مشاعر حلوة وكإنه فعلًا جالس يرفه عن نفسه .

طبعًا معاكم وحده ما أستوعبت إنه البطلة ماريا و آيدا يشبهوا بعض مره طبعًا من فهاوتي كنت أحسبهم نفس الشخص لييين جو باللقطة مع بعض بس بعدين طلع الفرق إن البطلة عينها بنفسجي وآيدا أزرق > مرره يجنن اللون البنفسجي .

اللقطة هذي موتتني لإني كُنت أفكر حقيقي إيش حتسوي بعد ماجاها وفسخ الخطوبة قدام الكل وهو اصلًا مو خطيبها وولا شيء .

والأمير بالبداية أتوقعته زي أي قصة تقليدية إنه شايف نفسه و و و و و و......... أحب أشكر اليابانيين إنهم حقيقي خرجوا عن المألوف وطلع الأمير مرررره حببووووه وفيه قصة خلف حركته مع ماريا الهبلة لمّا راح يفسخ العقد مع خطيبته الأصلية إللي هي آيدا عشان أخوه يحبها اصلًا لكن ماكان يعرف ملامحها ولا شيء بس يعرف إنها شقراء عشان كدا لخبط بينها وبين مآريا .
والمساعد إللي طول الوقت يجري ورا ميمي والأمير مسكيين نشف ريقه وهو وراهم على كل خُطوة.

حتى شخصية أبوها طلعت فجأة بعد كم حلقة وكُنت اتسآئل عنه و طلع مرره يضحك لكن شكله مُرعب مرررة .

واللي حلو إنه فعلًا مو بس البطلة لكن حتى آيدا أتجمعت مع أخوه أخيرًا وأتزوجوا كمان ماراحت قصة حبهم هباءًا منثورا .
شخصيًا أشوف نهايته لطيفة مرة وكان أنمي خفيف سهل ومُضحك كمان . ​

Sparks of Tomorrow​

حتى لو أبغى أحكي عن هالأنمي ماحقدر لإنه ماشاء الله صاحبة التقرير هند أبدعت بكل التفاصيل ماشاء الله عليها ..
أنصح إنكم تشوفوا التقرير ​

Victoria of Many Faces​

حتى هذا ماشاء الله صاحبة التقرير أنجل هارو ماقصرت بشرح الأنمي وأحس مافيه شيء أقدر أقوله بعدها.
يجنن أنصح فيه



❞ . .


لسا باقيلي كم أنمي لكن حركز عالأنميات هذي لإني مو كلها أنهيتها .
بس أنهيها ححول عالأنميات الباقية .
ومن الأشياء العجيبة بالنسبة لي كيف حلقة أنمي عبارة عن 24 دقيقة ولو شلنا الـOpening والـEnding بتصير أقل .. يكون فيها هالأحداث كلها ؟؟؟ وكيف أصلًا حلقات العمل اصلًا تكون قليلة يعني مثلًا 12 حلقة!! كيف كمية الأحداث والمشاعر هذي تكفيهم بالوقت هذا كله .
إيش معنى بالدرامات الحقيقية نجلس ساعات ساعات وماخلصنا .
لكن هذي من إيجابيات الأنمي .. على قد ما جالسة أتفرج أحس الوقت ماخلص ولا يومي أنتهى .


لي عودة بروح أتفرج أنمياتي ماصدقت بنتي أخذت غفوة .



- - - - - - - - - - - - - - - - - - - - - - - - - - - - - - - - - - -
❤❤❤❤❤❤​

 

[Lightless]

✦ فعالية الأسبوع الرابع لشهر سبتمبر | اعتراف ✦​

وراء كل شخص حكايات صغيرة لا تُروى، وأشياء احتفظ بها لنفسه طويلًا.. ربما لأنه لم يجد الوقت ليقولها، أو لم يجد من يشعر أنه الشخص المناسب ليسمعها.
لذلك نمنحكم هذا الأسبوع مساحة خاصة لكم.. اعتراف واحد فقط
قد يكون عن عادة، موقف لا تنسونه، فكرة لا يعرفها أحد عنكم، شعور خبأتموه، شخص ترك أثرًا فيكم، أو حتى أمر بسيط وطريف لم يخطر لأحد أنكم تفعلونه.

فما اعترافك الذي لم يجد طريقه إلى الكلام من قبل؟

───────────────
لا تنسوا تشاركونا، فالفعاليات فرصة للمتعة وتبادل الأفكار، ومشاركاتكم فيها تساعدكم في رفع مستوى ختم مدوناتكم.

تبدأ الفعالية بتاريخ 24/9 وتنتهي بتاريخ 30/9​

السكن في العوالم الموازية

وراء كل وجه هادئ ومستقر في واقعه المباشر عوالم أخرى خفية لا يراها أحد.
^ أخوفكم مني
أعترف إني أملك مهارة غريبة في الهروب ..ما أحرك فيها جسدي نهائيًا لكني أغيب بروحي وتفكيري داخل عوالم موازية واختيارات دقيقة تفصلني تمامًا عن صخب الواقع وأستمتع فيها جدًا ..
أحياناً ألقى نفسي غارقة في دراسة تفاصيل لغة جديدة وقواعدها أو أتقفى أثر القصص والخلفيات لأعمال أعيش تفاصيلها بصمت و أتأمل غرابة الكائنات الحية و أبحث عن حكايات قديمة نسيتها الذاكرة.
وللأسف إنه مايتوقف شغفي عند هذا الحد يمتد لدرجة إني أخذ ساعات طويلة في تتبع أصل الغذاء وفوائده الحقيقية وأبحث في حقيقة كل ما يدخل الجسد والبحث عن المكونات الخام اللي مالمستها يد العبث والتصنيع البشري لسا أنا فعليًا أجد متعة في تفكيك الفوائد وأدرس عن الطبيعة بصمت وهدوء ..
هذا الهروب مو ضعف ولا تهرب بالمعنى السلبي .. أنا اشوفه مساحة أمان خاصة أستعيد فيها ترتيبي الداخلي ..
طبعًا في هذي العوالم الافتراضية حقتي نهائيًا مافيها ضغوط ولا تفاصيل مزعجة .. فيه فقط شغف وهدوء لامحدود ..
​

 

[Lightless]

❞

الآن أتخيلوا ريحة المُدونة بخووور وعطور .. جالسة أحس إني نظفت المدونة
رحت عدلت على كل تدويناتي ونسقت النُصوص ورتبتها بطريقة أرضتني .. > أتمنيت إني صورت قبل وبعد <
لإني أفتتحتها أول مارجعت للتون فـ كُل تدوينة بطريقة تنسيق مختلفة عن الثانية وإللي مشموقة يمين واليسار وإللي نصها كبير وإللي نصها صغير والحالة حالة ما أرتحت إلا وهم مرتبين وأخذتها فرصة أتعلم ألون وأرتب النص
وتدوينة الأنميات إللي بتفرجها كانت طوييييلة بطريقة مو طبيعية طلعت 1500 كلمة واضح ماخليت في نفسي شيء المُهم رحت أخفيت النصوص تحت كُل أنمي .. يوووه أحس كإني رتبت دولابي حقيقي
وإللي يضحك إني كاتبة بالتدوينة :​

* ترا ممكن أكون جالسة أحرق ففضلًا إللي يتفرج الأنميات دي ينتبه * ​

ركزوا على كلمة ممكن جالسة أحرق .. أكتشفت إني جالسة أحرق .. مافيها ممكن نهائيًا فحسيت أفضل أخفي الكلام


. . . . . . . . . . . . . . . . . . . . . . . . . . . .


هالأسبوع أول أسبوع أحس بالراحة فيه بحياتي .. أخيرًا بعد سنة وشهرين تقريبًا صار فيه عند بنتي روتين مُعين .. صار فيه غفوة بوقت محدد .. وصار فيه وقت نوم تقريبي برضو!!! أقسم بالله إني أتوقعت هذي الأشياء أحلام ومستحيل تصير وكُنت متقبلة حياتي عادي لإني حسيت خلاص مافيه مفر ..
يعني أنا رسميًا جالسة أعيش حُلمي
يمكن هذا الترتيب والتنظيف الإلكتروني ما هو إلا انعكاس للي صاير جواتي وفي حياتي لإنه لمّا استقر الروتين حسيت إني محتاجة أرتب كل شيء باقي لإنه رتبت جوالي ، ملفات لابتوبي .. وصولًا للمدونة
أشوف إنه خطوة حلوة مني إني ماقررت أنقل مدونتي للأرشيف وأفتح جديدة .. تقبلتها زي ماهي لكن عدلت عليها وهذا واحد من أهدافي إللي أبغى أوصلها لإني دايمًا أحذف وألغي كل شيء وابدأ من الصفر
حمدلله لك يارب


. . . . . . . . . . . . . . . . . . . . . . . . . . . .


و اليوم كان عندي كلاس للغة الكُورية مع مُدرستي إينجاي
حرفيًا أكثر إنسانة كيوت قد قابلتها بحياتي .. صارلي 4 شهُور أخذ دروس عندها وهي إللي خلتني أنطق في واقعي .. ماعندي أحد يتكلم كوري نهائيًا بحياتي وخطوة الدروس هذي دفتني دف وخلتني أتكلم بكُل أريحية
طبعًا أنا متعلمة سابقة للغة من 2011 لكن تقريبًا مهاراتي كانت بين القراءة والكتابة والإستماع .. الكلام أكثر مهارة أنحدرت بمُجرد إختفاء صديقاتي الكوريات من جدة بسبب كورونا وماعاد نطقت من 2020
من الأشياء إللي أحبها إنها تسأل أسئلة عامة لكن أنا أحب أهرج وكُل مره أصدمها بقصصي > مُتحمسة وتبغى تمارس اللغة
يعني ما أكتفي بالأجوبة القصيرة نهائيًا .. لازم أخلي إجابتي طويلة وفيها قصة أغثها فيها
اليوم كان المُوضوع عن ( كيف تتكلم عن مخاوفك ) تعطيني مُفردات مع الأمثلة وقاعدة جديدة وفقرات مُحادثة وأسئلة مرره مُمتعة
وأكتشفت من أجوبتي معاها إني ماني قلوقة وماعندي قلق وعجزت أحدد هل هذا تبلد ولا لامُبالاة ؟؟؟ لايكون إكتئاب مُتخفي ؟؟؟؟
زبدة المُوضوع هذي المُدرسة تقريبًا تعرف كل قصصي وممكن تعرف أقاربي وصديقاتي من قصصي على قد ما أخذهم أمثلة وأجوبتي الصادقة جدًا مخليتني أحس كثيير إني أم زكي وإينجاي فعليًا كإنهُا وحدة من جاراتنا مو معلمة أونلاين من خلف الشاشة

彡

حقيقي أستوعبت إن الحياة حلوة بتفاصيلها الصغيرة هذي .. استقرار الروتين وإني أصنع مساحة خاصة لكل شيء هو الإنجاز الحقيقي اللي كنت أنتظره ..
و طبعًا أنا مسوية لنفسي تارقت ردود بالشهر في التون وخلاص استنفذته تمامًا .. أنتظروني في 1 أوكتوبر
لقيت أنمي تصنيفه رعب وأول مره أتفرج أنمي قصته كدا .. لو طلع حلو 100% حعمل له تقرير

لي عودة
❤❤❤❤❤❤​

 

[Lightless]

– – – – – – – – – • 彡 • – – – – – – – – –

هبات العصر وعقدة الأجيال

نفسي أتحكى شوية
ما أقدر أقول إني أكتشفت لإني أنا عارفة ودارية وأنا جالسة أعيش بالطريقة هذي بقراري صراحًة
وهو إنه أنا بالفعل مو دارية إيش صاير بالدُنيا.
فجأة القى مقطع صووتي مشهور وأنا موفاهمة ليه مشهور ألقى ترندات حلى وكيك وفيديوهات أو كلمات مُعينة وأنا بالفعل مو فاهمة السبب لكن بنفس الوقت مو مُهتمة.
وفيه قريبات ليّ صغار تقريبًا أشفقوا على حالي وعاملوني بمعاملة ( رفقًا بها )
ودايمًا يجوا يوروني الفيديوهات والصور والأشياء الجديدة وكُل مره ينجلطوا لما يسألوني ( تعرفي الترند الفلاني؟ ) وأنا كالعادة ما أعرفه
وحتى لما يجوا يوروني الأشياء مرره أتعجب من فكرة إنه شيء ماله معنى أو قيمة أو وجود و فئة من الناس فجأة تخليله وجُود وقيمة ومعنى بطريقة غريبة ..
وصرت أشوف تنافس غريب مين يسوي ترند ومين يجرب ومين يستغل الترند الفلاني عشان يسوق لنفسه أو للمحل حقه مثلًا..
ما اقدر أقول إني مو متقبلة إللي صاير لإنه هذا حال الدُنيا طبعًا ومو شيء جديد إنه كل شوية فيه ترند وهبات لكن الطُرق مُختلفة الآن صار كل شيء قدام عيننا .. وأنا أخترت إني أقفل عيني وما أبغى أشوف..
وعشان أكون صريحة من يوم يومي ما أحب الأشياء اللي تصير حديث الجميع ويصير عليها شوشرة بالفعل مايجيني أي إهتمام وولا عُمره جاني ندم1% إني مثلًا ليه مو عارفة هالشيء؟؟؟ فلما شُفت نفسي بالفعل مرتاحة ومقتنعة قررت أكمل حياتي بهالطريقة.
وما أحب أقلل من أجواء الآخرين وأصفها بالتفاهة مثلًا لكن أنا بالفعل ما أفضلها..
ومُتوقعة هالحال ماحيطول بسبب بنتي . أحس ما حأقبل إني ما أشاركها وأشوف إيش بيصير جديد بوقتها وأشاركها > والله إنه يعتبر أقوى تنازل ممكن حسويه بحياتي لكن بالفعل أشوفه شيء وجب أسويه ووجب أتقبل إنه الدُنيا جالسة تتغير والأجيال بتتغير والإهتمامات والأجواء وكُل شيء جالس يتبدل..
خليني أتكلم عن نقطة عُقدة الأجيال إللي أنا ضدها وجدًا.
دائمًا أشوف كُل جيل يقلل من الثاني وكُل جيل ينتقد الثاني وكُل جيل يشوف نفسه الأفضل وألأنقى والأطهر من إللي بعده.
وهالمُفردات بالنسبة لي جدًا غريبة .. ماعُمري شُفت أحد يقول خير على الجيل إللي بعده!! أشوفه إستعلاء أو تعصب بطريقةٍ ما. رُغم إنه العالم يشهد تطور مابعده تطور خلال سنين بسيطة جدًا .. ما أشوف أحد يقول حمدلله لقيوا علاجات لأمراض دمرت أجيال وحمدلله فيه تطور فظيع بالطب!!! حمدلله الدنيا صارت أسهل أول كُنا نتعب حتى بشرب المُوية!!! حمدلله أهلي أقدر أتواصل معاهم لو إحنا بيننا بلاد بسبب الإنترنت ....... أي شيء لو بسيط ما أشوف أي أحد يذكره...
ونفس هذول البشر إللي منتقدين الجيل الجديد والتطور هُم أول ناس جالسة تستخدم كُل التقنيات وكُل الوسائل المُتطورة قبل الجيل الجديد أصلًا ومايستغنوا عنها بحياتهم اليومية ويسبوها
حضرني موقف من بداية قدحاتي وأنا صغيره كان إنسان يقربلي للأسف وأنا مُتبرية منه طول الوقت كان يقول إنتوا جيلكم وإنتوا جيلكم وإنتوا جيلكم .. وأنا كُنت صغييرة مره لكن أتعجبت من ألفاظه وكيف جالس ينعتنا بأسوأ الصفات والكلام وعلى أساس شايف نفسه بيقول حكمة!! هالإنسان أبو لـ 5 أطفال... بيغلط على مين وإيش سويناله ؟؟؟
وطبعًا كان بدون أي سبب فجأة يجي و إحنا متجمعين بمكاننا و جالسين نلعب ولانضحك ولانتكلم ولا بنسوي أي شيء مبسوطين فيه .. كان يتنرفز وكإننا مسوين جريمة وللأسف إنه حقيقي كُنا في حالنا .. كم مره كُنت أشتكي وأستغرب منه وللأسف محد من إللي في حياتي كان مُهتم اصلًا وللأسف كانوا يتفقوا معاه بالرأي قدامي .. وكل إللي في عُمري كان متضايق منه لكن موعارف كيف يتصرف
إلى ماجاء هذاك اليوم إللي كُنا نلعب ونضحك ومبسوطين وجاء عاد الكرة للمرة المليون .. إنتوا جيلكم...... إنتوا فيكم....... إنتو أسوأ جيل..
قررت أعلن الحرب و بكل لامُبالاة وبرود قدام الكُل سألته : وهذا الجيل الـ.. طيب مين رباه؟؟؟ مو جيلكم؟؟

هذا الإنسان وإللي على شاكلته للأسف حضروا اسوأ الظروف مقارنًة بالآن زي إنه مثلًا صعوبة المواصلات ومافيه الأشياء إللي ممكن تسهل الحياة وحتى نلاقي عندهم قصص مفقودين موعارفين إيش صار فيهم وكيف وفينهم بسبب إنه ماكان فيه وسائل تواصل عادي جدًا الأب يودع عياله عشان بيسافر لعدة شهُور وهُم مايقدروا يوصلوله إلا بطرق محدودة جدًا ولو أختفى ماحيعرفوا عنه شيء..
ومع ذلك بدل ما يحمدوا ربهم إن الحياة تطورت وصارت أسهل وأسرع تلاقيهم متسخطين ومنتقدين وكإنه تطور الدُنيا عييب ولازم نجلس في مُعاناة..
❞

ولعلنا إذا اتدبرنا هذي الظاهرة بعين العقل حنلاقي إنه عقدة الأجيال مراية تعكس عجز نفسي وقصور في استيعاب الطبيعة البشرية وسنن الحياة. . فالكون بطبيعته قائم على التطور والتجدد المستمر ياجماعة ومن المستحيل إنه يبقى العالم متحجر عند نقطة معينة لمجرد إنه البعض ألفها وأتعود عليها
وأشوف إن ذم الجيل الجاي والتسخط عليه هو يحمل معنى من الهروب من مواجهة العصر وتطوراته وأشوفها طريقة سهلة يمارس فيها البعض الوصاية الزائفة ليشعروا بالتفوق الوهمي إللي ماله وجود طبعًا.. فبدل من إنه يتحمل الكبار مسؤولية الحوار وبناء جسور التواصل والقرب من أطفالهم وتقبل إختلافهم وجديدهم.. يلجأ العاجزون إلى لغة التعالي ناسيييين إنه الزمن لا يتوقف وأن كل جيل يصنع أدواته ولغته التي فرضتها عليه ظروف عصره..
الاختلاف بين الأجيال هو تنوع طبيعي لا تناقض وان الحياة تُبنى على أساس الاحتواء والتقارب ولاتُبنى على الاستعلاء والازدراء.. ومن يعجز عن فهم لغة عصره ومواكبة إيقاعه ليس من المنطقي أن يحارب المستقبل لمجرد أنه لا يشبه ماضيه..
وأختمها بـ
التاريخ لا يعود للوراء..

– – – – – – – – – • 彡 • – – – – – – – – –​