أربعُ محطّات وحِكاية واحِدة | الأردُن (4 زائر)

[N A Y]

السلام عليكم ورحمة الله وبركاته
كيف الحال يا شعب التون الجميل
أهلاً فيكم بالموضوع يلي قررت اعمله قبل كم ساعة وخلصته عالسريع
قبل ما اغيّر رأيي للمرة الميّة بسبب عداوتي الشخصية مع تصغير
الصور وتقليل الجودة ولأن تجربتي الاولى قبل انتهت بفشل ذريع
حتى اني تفاجأت بأنه زبطت معي هالمرة
^ رغم انه كمان الجودة راحت رحلة بهالموضوع بس ممكن نقول إنه مقبول نوعًا ما

الصور كلهم من زيارتي للأردن بالصيف الماضي
والقصد بالعنوان هو أربع مدن مختلفة- رحنا لخمسة بس مشوّها-
ونبدأ بالعاصمة :

هاي الإطلالة كانت من شباك الفندق بوسط البلد، يلي هو المدرج الروماني-
بتصير فيه فعاليات كثيرة أغلب الأيام والدخولية اله مجاني او ب 1 دينار اردني
بس ما دخلناه ولا مرة للأسف

-هاي كمان من المناطق يلي لفيناها بوسط البلد-

-في شارع الرينبو-
هذا الباص يعتبر مثل تجسيد للباصات يلي كانت زمان أيام ما كانت
البلاد مفتوحة ع بعضها وكانوا الناس يتنقلوا حرفيًا في الباص من دولة للثانية
^ هذا للتصوير بس مو باص حقيقي من هذيك الأيام-

-عمّان بالليل من منطقة السلط أو بحكولها جبل عمّان-

مدينة الرقيم بعيدة عن عمّان نص ساعة -ما عندي فكرة عن المدينة نفسها وطبيعتها-
بس هذا مسجد أصحاب الكهف، واصحاب الكهف مدفونين بهذا المكان جنب المسجد
دخلنا للكهف و كان فيه 7 قبور مغطية لكن رفاتهم جميعًا موجودة في قبر واحد ومغطى بسقف زجاجي
يبان من خلاله العظام، وكان في آثار ثانية تخصهم مثل بعض الأغراض تبعهم وكتابات بلغة قديمة
المكان يفتحوه بعد كل صلاة لفترة قصيرة والدخول مجاني بس ما صورت فيه

هالمكان كان مطعم عادي بس الصورة ذكرى لآخر مكان رحنا عليه بعمّان بآخر ليلة بالأردن
قبل ما نرجع فلسطين

واجهة مطعم في البوليفارد حبيته بأمانة

-كمان في البوليفارد-

في الطريق للمطار -اكيد مش قهوتي انا عدوّة القهوة-
وتحت جولة من أماكن بمطار الملكة علياء

-حلويات فلسطينية استغربت من اني لقيتها هنا-

غالبًا الهم قصة بس ما بعرف شو هي بالضبط
واثنينهم بتحركوا ع فكرة الشايب يضل يحرك بشوبك العجين
والنايم بطنه نازل طالع -انه بتنفس وهو نايم يعني xd-

كتب في كل مكان -للفرجة بس لأن الاسعار شاطحة طبيعي مطار-

​

 

[N A Y]

-قلعة عجلون أو قلعة صلاح الدين الأيوبي-
بنيت بأمر صلاح الدين أيام الحروب مع الصليبيين ومثل ما باين
من الصور فوق قديش هي مرتفعة عن باقي المناطق
شفنا الفتحات الصغيرة يلي كانوا يطلقوا منها السهام
وكان في متحف اثري داخلها في أغراض وفسيفساء
وكتابات كثيرة، بتذكر اني صورت كل هالامور بس مش لاقية الصور للأسف
وحسب خبرتي أم الاسبوع ونص حسيت انه هالمدينة احلى مدينة
شكل وطقس وأكل بعطيها 10/10

التلفريك بعجلون كمان قريب من القلعة -
والببغاء لواحد من الموظفين غالبًا نسيت شو بعمل هناك

هالمدينة لو اضل اقول عنها بعيدة لصبح العيد ما رح اخلّص
حسيت الطريق الها اول مالها آخر، او يمكن لأن الطرق بين مدننا
بفلسطين اقصر من هيك مش متعودة عالبلاد الكبيرة xd
بس رحنا بسيارة كهربائية وما كان في نقاط شحن وصارت
البطارية بآخرها لما وصلنا واد رم -بعد البترا- ولانه الشحن
ما يكفي لحد الرجعة لعّمان كانت الخطة نكمل للعقبة لأنها أقرب علينا هناك
^ وصلنا آخر الخريطة حرفيًا

هذا كان شكل الطريق لحد ما وصلنا خزنة البتراء ممر باتجاه واحد طويل
جدًا من كل الجوانب حواليك صخور مرتفعة بهذا الشكل
لكن المنظر كان يستاهل تعب الوصول اله، ما يعتبر من
عجائب الدنيا السبعة عن عبث

نهاية الطريق قبل الوصول للخزنة

-أزبط صورة طلعت معي بالمكان-

-طبعًا المكان مو بس عبارة عن الخزنة اعطونا المرشدين خريطة كبيرة طويلة
عريضة لأماكن كثيرة كان بعد الخزنة في مسار مشي كمان
يوصل لمسرح وأماكن ثانية بس الشمس كانت تضرب ضرب
ف ما مشينا بعده كثير ولفينا ورجعنا
تعليقي الوحيد السلبي ان الدخولية للمكان غالية!
50 دينار للسيّاح - للأردني الجنسية بـ 1 دينار
للفلسطيني بـ 30 حسب ما أتذكر
وهذا الارتفاع صار فجأة مدري شو مصدره بس لحد قبل سنتين كان السعر للسياح 10 بس

-استأجرنا كوخ مثل يلي بالصورة بس ما جلسنا فيه إلا ساعة ع كثر ما
كانت الدنيا حر فـ برا كان أبرد من جوا وبالليل صار الجو كثير حلو
فالسهرة كانت برا مع عشا مرتب والكثير من الشاي عالنار-

-صورتي المفضلة من السفرة كلها بس تأطير الصورة وتصغيرها مودي
الجودة بستين داهية-

وإلى هنا انتهت الصور، نلتقي بموضوع جديد بصور من دولة جديدة -بس اسافر أول ع خير-

​

 

[سُكر]

السلام عليكم ورحمة الله وبركاته
يعطيكي العافيه حبي
الحمدلله انك نشرتيه وهاي ردي عشان ماتفكري تتراجعي علاخر
ماشاءالله جمال الاماكن والمناظر الطبيعيه
فعلا رحله جميله وزياره اجملل وواضح انك استمتعتي بسفرتك جدا وماتركتي مكان الي زرتيه
حبيت المنطاد او البالون يلي بطير كثير حبيتو بدي اطير واحد
والبتراء قد مهي بعيد قد مهي ماشالله مناظر لا تفوت وجمالها بجنن والصور الي فيها تحفه فنيه
المناظر بالليل ولا غلطه ماشاءالله الجمال
ترى الضفه مش صغير بالتنقل جربي اطلعي من طولكرم للخليل او بيت لحم وارجعي احكيلي قصيره
حبيت بس شفت اشياء الها علاقه بفلسطين والخريطه واهم اهم اهم اشي العنبتاوي هوا عمو شو بيعمل هناك
هلا العنبتاوي المفروض موجود بطولكرم شكلك كرميه ولا الو فروع ثانيه وانتي غير مدينه
بس فعلا الكتب عندهم غلاء مش طبيعي بتكون نسخه رقم واحد او 2 وموقعه من الكاتب الاصلي اغلبهم لهيك الاسعار غاليه حتى لو كان معرض وقتها
المهم انك انبسطي ووثقتي صور جميله ترجعي تتزكريها وتتحسري انك رجعتي ع هالبلد
بس ماحبيت لازم تشربي قهوه وتحبيها زيي طلعنا بنحب ايرين ونشرنا موضوع صور بنفس الوقت وقفت عالقهوه
التصميم للطيف وحضاري مثل حضارة الاردن وجمالها
والتقاطات جميله من شخص مستمتع وسعيد برحلته
والمهم انك نشرتيه لانو الصور جميله حاسه حالي مسافره من مكاني حاليا
تقبلي مروري البسيط على موضوعك الجميل
في امان الله

 

[RAIN.]

السلام عليكم ورحمة الله وبركاته.
كيف الحال ناي ؟
إن شاء الله تكوني بخير.

ما شاء الله على جمال تصويرك وزاوية أخذك للقطات كتير رهيب، جبتِ جمال الأماكن بشكل ساحر كما هو موجود على الواقع
عمّان مدينة جميلة بصراحة خصوصًا اللي رحتِ عليهم يُعتبروا أحلى الأماكن فيها، وسط البلد فيه كتير من التراث الأردني مع العديد من جو المطاعم والاكتظاظ والسيّاح، أسوأ إشي فيه زحام الشوارع لدرجة خانقة !
وكيف أقنعك إنه المُدرّج مش إشي واو فيكفي رؤيته عن بُعد ..
البوليفارد جماله بإنّه فيه العديد من المولات وكلّ ما تشتهيه النّفس خصوصًا الأكل XD
عجلون مكان جدًا جميل بالقعلة والأشجار اللي حواليها لحالهم بعطوها جمال من نوع آخر، زيارتها كانت مُريحة للنفس، ووجود التلفريك كان إضافة رائعة فيما بعد !
البتراء أو المدينة الوردية، من الصعب وصف جمالها ومهما كانت الصور جميلة الواقع فيها غير، وكلامك صحيح إنّها مش بس عبارة عن خزنة هي أكبر من هيك، مدينة كبيرة وكلها منحوتة بالصخر الوردي ما بتقدري تلفيها بيوم واحد أبدًا لحجمها، واللي بده يمشي فيها بموت من التعب وهو مش ماشي إلا أولها لعند الخزنة
وأتفق معك بخصوص غلاء الأسعار بشكل مُبالغ فيه مع الأسف !
بحس جمال وادي رم أكثر إشي بالليل خصوصًا بعد الإضافات اللي صارت فيه من الأكواخ وغيرها
في كمان كتير أماكن حلوة مثل السلط اللي جمالها بكثرة اللون الأخضر الرّهيب المُريح، وإربد وجرش أصحاب المعالم الأخرى في حال أجيتِ بزيارات ثانية أعطيهم فُرصة

يعطيكِ العافية على هاي الالتقاطات الموفّقة، حسيت وكإنّي كنت معك بهاي الأماكن حيث لكل مكان في الي ذكريات كتير حلوة فيه، شو نحكي عن جمال الصور الحيّة، وألوانها المأخوذة من الواقع نفسه بدون ما يمسّها أي سوء موجودة كما هي، وحسيت الجودة مش بهذا السوء مثل ما وصفتيها، وكلّه بجهة وجمال تصميم الطقم ودقّة تفاصيله بطريقة لطيفة وهو مليء بالمحطات ذات الحكاية الواحدة بشكل بسيط بجهة ثانية !
أهم إشي تكوني انبسطتِ واستمتعتِ بالرحلة اللطيفة والطويلة بنفس الوقت، ويعطيكِ العافية أبدعتِ بكل صدق، لا تحرمينا من هكذا جمال لو سمحتِ
تقبّلي مروري، وفي أمان الله.

 

[Shine]

أكثر اشي زعلني انك ما دخلتي المدرج الروماني
بصراحة بالنسبة إلي المدرج كان أكثر تجربة بنفسي أخوضها بتفاصيلها و أشوفه وقت آخر النهار و بالليل
و بتمنى بتمنى لو أفوته و هو فاضي ههههههههههههههههههههههه

أنا دخلت ساحته و تفرجت من بعيد و كان ثاني يوم
مباراة وقت كأس العالم فكان في تجهيزات و هيك و اللي معي ما رضيو يطلعوا عالمدرج فوق و نتفرج هناك.

أنا كثير بحب أتخيل كيف الناس كانوا موجودين بالمكان
قعدت أفكر كيف بنوه و اشتغلوا عليه و قديش مرتفع من فوق و كيف كانت الحياة عنده و حوليه قبل.

كثير كان الشعور حلو و أنا بتفرج عليه و أنا لأول مرة بشوفه و هو هالقد قريب، و خصيصا إني مشيت لحد ما وصلته فلمه شفته كنت كثير مستمتعة بالمنظر
هاي صورة من عند مطعم نعمة عند جبل القلعة.
-